Қазақстан Халық партиясы сайлау қорытындысын мойындайды Нұрсұлтан Шоқанов

Қазақстан Халық партиясының төрағасы Нұрсұлтан Шоқанов сайлау қорытындысына байланысты қазақстандықтарға үндеу жасады, – деп хабарлайды Aikyn.kz 

Бүгін елімізде маңызды оқиға – Құрылтай депутаттарының сайлауы өтті.

Тәуелсіз Қазақстан тарихында мұндай сайлау алғаш рет Жаңа Конституцияға сәйкес өткізілді.

Бұл сайлау – қатардағы оқиға емес. Жаңа Құрылтайдың жасақталуымен Президент бастамашы болған ұлттық жаңғырудың жаңа кезеңі басталады.

Сайлау учаскелеріне келіп, дауыс беруге белсенді қатысқан әрбір азаматқа алғыс айтқым келеді. Сіздердің азаматтық ұстанымдарыңыз, елдің болашағына бейжай қарамауларыңыз – қоғамның саяси мәдениетінің көрсеткіші.

Қазақстан Халық партиясына дауыс берген әрбір азаматқа шынайы ризашылығымды білдіремін. Алдын ала Exit poll нәтижелері бойынша бізге сайлаушылардың кемінде 3%-ы дауыс берді. Алайда бұл әлі түпкілікті көрсеткіш емес. Сіздердің сенімдеріңізді біз үлкен жауапкершілік әрі алдымызға қойылған міндет деп қабылдаймыз. Халқымыздың үмітін ақтау үшін қолдан келгеннің бәрін жасаймыз.

Біз белсенді әрі сапалық тұрғыдан жаңа сайлау науқанынан өттік. Партиялар бірден төрт республикалық телеарнаның тікелей эфирінде бетпе-бет пікір таластырды. Миллиондаған қазақстандықтар өңделмеген ашық пікірталасты көріп, тараптардың нақты ұстанымдарын естіді.

Сайлау науқаны кезінде жүздеген халықаралық және мыңдаған қазақстандық байқаушы жұмыс істеді.

Бұл сайлау үдерісінің ашықтығын көрсетеді.

Президент жүргізіп жатқан реформалар партиямыздың идеологиясымен үндеседі. Біз өз рөлімізді осы реформаларды жүзеге асырудағы сенімді серіктес болудан көреміз.

Құрылтай жұмысының басталуымен еліміздің жаңартылған саяси институттарын қалыптастыру үдерісі басталады.

Сайлау қорытындысынан барлық қазақстандықтар және тұтас еліміз ұтады.

Барлық кандидаттар мен партияларға бәсекелі әрі мазмұнды сайлау науқаны үшін алғыс айтамын. Бұл – саяси жүйеміздің кемелденуінің белгісі.

Қазақстан Халық партиясы бүгінгі дауыс беру қорытындысын объективті деп таниды және басты мақсат – әрбір қазақстандық отбасының әл-ауқаты, Әділетті Қазақстанның сенімді дамуы мен тұрақтылығы жолында басқа партиялардағы әріптестермен бірлесіп сындарлы жұмыс істеуге дайын екенін мәлімдейді.