​Қазақстан Лукойл активтеріне басым құқығын мәлімдеді

Қазақстан Үкіметі АҚШ Қаржы министрлігінің Шетелдік активтерді бақылау басқармасына (OFAC) ресми түрде хабарлама жолдап, ресейлік «Лукойл» компаниясының қатысуымен жүзеге асатын мұнай-газ жобаларындағы үлестерді сатып алуға мемлекет тарапынан басым құқық бар екенін жариялады, деп хабарлайды centralmedia24.kz.

Энергетика министрлігінің мәліметінше, бұл хабарлама алдын ала жасалған және ұлттық заңнамаға сүйенеді.

«Жер қойнауы және жер қойнауын пайдалану туралы» кодекстің 43-бабында стратегиялық нысандарды мемлекетке басым құқықпен сатып алу құқығы бекітілген.

Хабарламаға себеп болған жағдай — Lukoil International GmbH компаниясының шетелдік активтерін сатуға қатысты жарияланған жоспар. Қазақстандағы активтерге бұл мәміле әсер етпейді, бірақ Астана өз құқықтық ұстанымын алдын ала білдірді.

Қазіргі уақытта «Лукойлдың» Қазақстандағы үлестері, соның ішінде Қарашығанақ, Теңіз және Каспий құбыр консорциумы жобалары қалыпты режимде жұмыс істеп тұр.

Бұл қадам Қазақстанның стратегиялық активтерге қатысты мүддесін қорғауға және болашақта меншік құрылымында өзгерістер болған жағдайда мемлекеттің басым құқығын бекітуге бағытталған.

Бүгін, 16:03