Қазақстан мен АҚШ арасындағы инвестициялық байланыс жаңа деңгейге көтерілді

Жақында АҚШ-тың Вашингтон қаласында Қазақстан алғаш рет SelectUSA Investment Summit алаңында өзінің инвестициялық дөңгелек үстелін өткізіп, АҚШ-пен экономикалық байланыстарды нығайтуда маңызды қадам жасады, – деп хабарлайды Aikyn.kz сайты.

«Strategic Sectors and U.S. Market Entry Opportunities» тақырыбындағы іс-шараға мемлекеттік органдар, инвестициялық қорлар мен консалтингтік компаниялардан 80-нен астам өкіл қатысты.

Іс-шараны Central Asia Strategic Advisory компаниясы QazTrade және Қазақстан Республикасының АҚШ-тағы Елшілігімен бірлесіп ұйымдастырды. Стратегиялық серіктес ретінде Freedom Holding Corp. қолдау көрсетті. Негізгі мақсат АҚШ бизнесінің Орталық Азияға қызығушылығы артып отырған кезеңде қазақстандық компаниялардың америкалық нарыққа шығуына практикалық алаң қалыптастыру болды.

Жиынға Мэриленд штатының конгрессмені Гленн Айви, сондай-ақ Қазақстан мен АҚШ елшілері қатысып, іс-шараның жоғары деңгейін айқындады. Өз сөзінде конгрессмен екі ел арасындағы іскерлік ынтымақтастықты кеңейтудің маңызын атап өтіп, Қазақстанның америкалық инвесторлар үшін сенімді әрі перспективалы серіктеске айналып келе жатқанын жеткізді.

QazTrade өкілі Рамазан Сламханов дөңгелек үстелдің қазақстандық және америкалық бизнес арасындағы тұрақты байланысты дамытудағы рөлін атап өтті.

«Біз қазақстандық компаниялар мен америкалық серіктестер арасында тұрақты байланыс орнатуға ұмтыламыз. Бұл дөңгелек үстел – Қазақстанның АҚШ-тағы инвестициялық инфрақұрылымын дамытудағы маңызды қадам»,-деді ол.

Іс-шара барысында қазақстандық компаниялар өз жобаларын таныстырып, бизнесті локализациялау, реттеуші талаптарға сәйкестік және стратегиялық серіктестер табу мәселелерін талқылады. Freedom Holding Corp. мен Eurasia Group Kazakhstan өкілдері халықаралық нарықтарға шығу тәжірибесін бөлісті.

QazTrade басқарма төрағасының орынбасары Айнұр Әмірбекова АҚШ-пен келіссөздер өткен жылдан бері жүргізіліп келе жатқанын атап өтті. Оның айтуынша, Қазақстан үшін бұл жаңа бағыт болғанымен, сұраныс байқалған.

– АҚШ-пен келіссөздер өткен жылдан бері жүргізіліп келеді. Қазақстан үшін бұл жаңа бағыт болғанымен, қазірдің өзінде тамақ өнеркәсібі өнімдеріне, сондай-ақ жоғары технологиялар саласындағы тауарлар мен қызметтерге, соның ішінде ШОБ сегментінен сұраныс байқалып отыр. Қазіргі уақытта алғашқы жеткізілімдер басталды. Қазақстанның әлеуеті жоғары, ал мұндай бастамалар АҚШ нарығына шығу үшін қажетті байланыстар мен инфрақұрылымды қалыптастыруға мүмкіндік береді,-дейді QazTrade компаниясының басқарма төрағасының орынбасары Айнұр Әмірбекова.

Талқылау қорытындысы бойынша SelectUSA өкілдері Қазақстанмен ынтымақтастықты одан әрі дамытуға, оның ішінде болашақта ауқымды іс-шаралар ұйымдастыруға дайын екенін білдірді. Бұл бастама Қазақстан мен АҚШ инвестициялық экожүйелері арасындағы жүйелі байланыстың негізін қалады.

Аталған жоба қазақстандық компанияларды халықаралық деңгейде ілгерілетіп қана қоймай, цифрлық экономика, өнеркәсіп және қызмет көрсету салаларында ұзақ мерзімді серіктестікті дамытуға жол ашады. Қазақстан жаһандық нарықтағы позициясын нығайтып, америкалық инвестицияларды тартудың жүйелі моделін қалыптастыруға ниетті.