Қазақстан мен ЕО ынтымақтастығын арттырудың жаңа жолдары талқыланды

Брюссельде Қазақстан мен Еуропалық Одақ арасындағы ынтымақтастықты күшейтудің жаңа жолдары талқыланды.

Еуропадағы азиялық зерттеулер институтында серіктестіктің стратегиялық болашағы мен оны кеңейтудің жаңа мүмкіндіктеріне арналған дөңгелек үстел өтті. Іс-шара Қазақстан мен Еуроодақ және оған мүше мемлекеттер арасында Кеңейтілген әріптестік пен ынтымақтастық туралы келісімнің 10 жылдығына арналды. Жиналғандардың айтуынша, өзара іс-қимылдың әлеуеті айтарлықтай кеңейген: «Орта дәлізді» дамыту мен цифрлық трансформациядан бастап, аса маңызды шикізат, авиация және ғарыш салаларындағы ынтымақтастыққа дейінгі серіктестік күшейіп келеді. Қазақстанның Бельгиядағы елшісі Роман Василенконың айтуынша, жоғары деңгейдегі кездесулердің тұрақты түрде өтуі және визаны жеңілдету жөніндегі келіссөздердің басталуы тараптар арасындағы диалогты тереңдете түседі.

Луко Урчиоло, Еуропадағы азиялық зерттеулер институтының зерттеушісі:

- Әлбетте бұл серіктестік Қазақстан экономикасына  оң әсер етеді. Өйткені Еуроодақ әріптестік аясын әртараптандыруға ұмтылатын маңызды донор және ірі экономикалық блок. Еуропалық Одаққа қажеттінің басым бөлігі Қазақстанда бар. Ал өз кезегінде Қазақстан Еуропаның технологиясы мен тәжірибесін тиімді пайдалана алады.