Қазақстан мен ExxonMobil ірі мұнай газ жобаларын талқылады

АҚШ-тың Хьюстон қаласында өткен CERAWeek халықаралық форумы аясында Қазақстанның Энергетика министрі Ерлан Ақкенженов ExxonMobil компаниясының өкілі Дэн Амманнмен кездесті.

Тараптар стратегиялық әріптестіктің жай-күйін және америкалық инвестициялардың Қазақстан экономикасындағы рөлін талқылады. Атап айтқанда, Теңіз кен орны мен Қашаған кен орны жобаларындағы ынтымақтастық нәтижелері жоғары бағаланды. Қазіргі таңда бұл жобаларда қазақстандық мамандардың үлесі 90%-дан асады.

Кездесуде өндірісті ұлғайту, газ өңдеу қуаттарын дамыту және мұнай экспортын әртараптандыру мәселелері қаралды. Сондай-ақ Теңіздегі кеңейту жобасының сәтті аяқталғаны атап өтілді.

Келіссөздер қорытындысында тараптар мұнай-газ саласындағы ынтымақтастықты одан әрі дамытуға және бірлескен жобаларды іске асыруды жалғастыруға дайын екенін растады.