Қазақстан мен Кения: Өнеркәсіп және сауда саласындағы ынтымақтастық кеңейеді

   Өнеркәсіп және құрылыс министрі Ерсайын Нағаспаев Кения министрімен тыңайтқыш, техника және теміржол өнімдерін экспорттау мәселесін талқылады.    

Ерсайын Нағаспаев Кения Республикасының Инвестициялар, сауда және өнеркәсіп министрі Ли Майани Киньянжуимен кездесу өткізді.

Кездесу барысында тараптар сауда-экономикалық ынтымақтастықты дамыту және өнеркәсіп саласындағы өзара іс-қимылды кеңейту мәселелерін талқылады.

Қазақстан тарапы Кенияны Африкадағы негізгі серіктестерінің бірі ретінде қарастыратынын мәлімдеді. Атап айтқанда, Alageum Electric компаниясының трансформаторларын, сондай-ақ әлемдік брендтердің тракторлары мен комбайндарын жеткізу мүмкіндігі сөз болды.

Сонымен қатар Қазақстанның минералды тыңайтқыштар өндірісіндегі әлеуетіне назар аударылды. Өткен жылы отандық кәсіпорындар 1 млн тоннадан астам тыңайтқыш өндірген.

Министрдің айтуынша, Қазақстан алдағы уақытта Эфиопия, Руанда және Уганда сияқты Шығыс Африка елдеріне өнім экспорттау мүмкіндігін қарастыруға дайын.

Кездесуде ҚазАзот, Қазфосфат және KAZ Chemicals Trading House компанияларының өндірістік әлеуеті де аталды.

Бұдан бөлек, қорғаныс-өнеркәсіп кешені, теміржол кластері өнімдері, Қайнар АКБ аккумуляторлары мен Silk Road Electronics тұрмыстық техникасын экспорттау мәселелері талқыланды.

Кездесу қорытындысында тараптар перспективалы бағыттар бойынша ынтымақтастықты дамытуға келісті.