Қазақстан мен Өзбекстан премьер министрлері Орта дәліз арқылы тасымалдау көлемін арттыру перспективаларын талқылады

Ақтау халықаралық теңіз сауда порты – Қазақстандағы ең ірі теңіз торабы және Транскаспий халықаралық көлік бағытының негізгі нысандарының бірі. Жалпы ауданы 44 гектарды құрайтын кәсіпорын жылына шамамен 12 млн тоннаға дейін жүк өңдеуге қауқарлы. Порт Кавказ, Орталық Азия және Каспий өңірі елдері бағытында жыл бойы тұрақты тасымалдауды қамтамасыз етеді.

Қазақстан мен Өзбекстан арасындағы уағдаластықтарды жүзеге асыруға арналған Жол картасына қол қойылды

Премьер-министр Олжас Бектенов Мемлекет басшысының тапсырмасына сәйкес, Қазақстан Үкіметі өңірдің теңіз инфрақұрылымын дамытуға басымдық беріп отырғанын атап өтті. 2025 жылы Қазақстан Каспий маңы мемлекеттері арасында бірінші болып Құрық портының акваториясында түбін тереңдету жұмыстарын аяқтады. Ақтау портындағы осындай жоба жыл соңына дейін аяқталады деп жоспарлануда. Бұл жүк тиелген кемелердің қауіпсіз кіруін қамтамасыз етуге, өткізу қабілетін арттыруға және порт қуатын одан әрі кеңейтуге мүмкіндік береді.

Қазақстан мен Өзбекстан ынтымақтастығы нығая береді

«Қазақстан темір жолы» ұлттық компаниясының басқарма төрағасы Елжас Отыншиев Ақтау және Құрық порттары инфрақұрылымының жиынтық қуаты жылына шамамен 22 млн тоннаны құрайтынын баяндады. Контейнерлік тасымалдау сегментінде тұрақты өсу байқалады. 2022–2025 жылдары Қазақстан порттары арқылы Транскаспий халықаралық көлік бағыты бойынша контейнерлік транзит 3,8 есе өсті. Тасымалдау көлемін одан әрі ұлғайту үшін порт қуаттары дәйекті түрде кеңейтіліп, теміржол тәсілдері жаңғыртылуда. Ақтау портында қуаттылығы жылына 140 мың ЖФЭ контейнерлік хабтың бірінші кезегі пайдалануға берілді, екінші кезекті жүзеге асырғаннан кейін 2027–2028 жылдары оның жалпы қуаттылығы 240 мың ЖФЭ-ға дейін ұлғаяды. Теңіз тасымалын кеңейту үшін алты контейнерлік кеменің құрылысына тапсырыстар берілді, оның төртеуі 2027 жылы, тағы екеуі 2028 жылы жеткізіледі деп жоспарлануда. Сонымен қатар Шалқар – Бейнеу және Бейнеу – Маңғыстау учаскелеріндегі теміржол инфрақұрылымын жаңғырту аяқталып, Ақтау және Құрық порттарына жүктерді үздіксіз тасымалдауды қамтамасыз етеді.

Қазақстан мен Өзбекстан заңсыз активтерді қайтару тетіктерін талқылады

Қазақстан мен Өзбекстан арасындағы тасымалдардың бәсекеге қабілеттілігін арттыруға ерекше назар аударылды. Мәселен, 2025 жылы Ақтау және Құрық порттары арқылы Өзбекстан жүктерін өңдеу көлемі 60%-дан астамға артты. Жүк жөнелтушілер үшін қолайлы тарифтік жағдайлар жасалған. Дамыған теміржол және порт инфрақұрылымы жүктерді жеткізу мерзімін едәуір қысқартуға мүмкіндік береді.

«Мемлекет басшысы Қасым-Жомарт Тоқаев теңіз және теміржол инфрақұрылымын дамытуға басымдық береді. Маңғыстау облысы транзиттік және логистикалық әлеуеті жоғары, стратегиялық маңызды аймақ болып саналады. Біздің міндетіміз – Орталық Азия елдерінің жүктерінің Кавказ, Түркия және Еуропа нарықтарына жылдам әрі сенімді шығуын қамтамасыз ету. Қазақстан Ақтау және Құрық порттары арқылы Өзбекстанның экспорттық жүктерінің транзитін кеңейтуге дайын», деп атап өтті Олжас Бектенов.

Қазақстан мен Өзбекстан премьер-министрлері «Қазақстан темір жолы» ҰК» АҚ мен «Өзбекстан темір жолдары» АҚ бірлесіп, тасымалдау көлемін ұлғайту бойынша нақты жоспар әзірлеуін тапсырды.

«Ақтау халықаралық теңіз сауда порты» ҰК басқарма төрағасының міндетін атқарушы Ғалым Айтжанов инфрақұрылымды дамыту және контейнерлік хаб салу туралы айтты. Порт қуатын кеңейту және түбін тереңдету Қазақстан арқылы Кавказ аймағы мен Еуропа елдеріне транзиттік маршруттардың жүк ағынын едәуір арттыруға мүмкіндік береді.

«Президенттің тапсырмасы аясында экономиканы әртараптандыру бойынша негізгі жұмыстар үш бағытта жүргізілуде. Бүгінгі таңда порт инфрақұрылымын дамыту аясында бірінші кезеңде контейнерлік хаб салынды. Контейнерлік хабтың жылдық өткізу қабілеті шамамен 140 мың ЖФЭ контейнерді құрайды. Келесі жылдың басында жобаның екінші кезеңі жүзеге асырылып, бұл көрсеткіш жылына 240 мың ЖФЭ-ге дейін артады. Сонымен қатар Ақтау теңіз порты акваториясында түбін тереңдету жұмыстары қатар жүргізіліп жатыр. Бұл жұмыстар жүк ағынының көлемін ұлғайтуға мүмкіндік береді. Түбін тереңдету жұмыстарын биылғы жылдың соңына дейін аяқтауды жоспарлап отырмыз», деді Ғалым Айтжанов.