Қазақстан мен Өзбекстанның медицинадағы ынтымақтастығы артады

Қазақстан мен Өзбекстан медицина саласындағы байланыстарды одан әрі тереңдетуге ниетті.

Ташкентте Қазақстанның Өзбекстандағы медицина күндері аясында халықаралық форум өтіп, екі елдің денсаулық сақтау саласының басшылары бірнеше бағыт бойынша ортақ меморандумдарға қол қойды. Оның ішінде кадр даярлау, ғылыми зерттеу орталықтарының өзара байланысын арттыру сияқты маңызды құжаттар бар.

Қазақстанның жетекші клиникаларының 100-ден аса маманы Өзбекстанның бес қаласында — Ташкент, Ферғана, Самарқан, Бұқара мен Нүкісте көшпелі консультациялар, мастер-кластар мен операциялар жасады. 3000-ға жуық жергілікті тұрғын мамандардан кеңес  алып, 60-тан аса күрделі хирургиялық операция жасалды.

Барнохон Камилджанова, Өзбекстанның Эндокринология ғылыми-практикалық орталығы директорының орынбасары:

- Өте маңызды жоба жүзеге асты. Тарихта қалатындай іс жасалды. Ең бастысы халық үшін пайдасы зор. Бұл екі мемлекеттің арасындағы достықтың, бауырластықтың шынайы белгісі. Қазақстанның ең мықты, тіпті есімдері әлемге танымал дәрігерлері мен  профессорлары келіп, өздерінің әріптестеріне білген- түйгендерін үйретті. Қымбат медициналық аппараттарын алып келіп, күрделі оталар жасады. 

Диагностикалық аппараттармен жабдықталған жылжымалы медициналық автобустар Сырдария, Жизақ облыстарының ауылдарына барып, тұрғындарды медициналық тексеруден өткізді. 

Олимхон Хаджиханов, Өзбекстан денсаулық сақтау министрлігі халықаралық бөлімінің бас маманы:

- Қазақстанның дәрігерлері Өзбекстанның түпкір-түпкіріне жол жүріп, медициналық масстер кластар ұйымдастарды . Халықтың денсаулығын тексерді. Әлбетте бұл байланыстар ары қарай тереңдеп, дәрігерлер арасында тәжірибе алмасу бастамасы жалғасатын болады. 

Қазақстанның жоғарғы оқу орындары мен Ташкент мемлекеттік медицина университеті арасында ғылыми олимпиадалар мен спартакиада өтті. Екі ел министрлері кадр даярлау ісінде ынтымақтастықтың маңыздылығын атап өтті.

Ақмарал Әлназарова, ҚР Денсаулық сақтау министрі:

- Тағы бір маңызды шаралардың бірі – ол біздің студенттердің басын қосу. Бүгінгі күні Қазақстанда 700-ге жуық Өзбекстанның студенттері оқып жатыр. Біздің студенттер осы жақта оқып жатыр. Олипиадаларды да өткіздік. 

Форум қорытындысы бойынша Қазақстан мен Өзбекстанның ғылыми орталықтары, жетекші клиникалары, медицина  университеттерінің арасындағы ынтымақтастық туралы бірнеше  меморандумға қол қойылды.

Дулат Нуркин