Қазақстан мен Palo Alto Networks киберқауіпсіздік саласындағы бірлескен бастамаларды іске асыруда

Қазақстан Республикасының Жасанды интеллект және цифрлық даму министрлігі мен киберқауіпсіздік саласындағы әлемдік көшбасшылардың бірі – Palo Alto Networks компаниясы арасындағы ынтымақтастық жүзеге асыру кезеңіне өтті, – деп хабарлайды Aikyn.kz.

Тараптардың өзара әрекеттестігі Palo Alto Networks компаниясының киберқауіпсіздік саласындағы көпжылдық сараптамасына негізделген. Компанияның әлемдік технологиялық көшбасшы ретіндегі мәртебесі Қазақстанға озық халықаралық тәжірибелерді біздің ақпараттық қорғаныс архитектурамызға біріктіруге мүмкіндік береді. Мұндай ынтымақтастық елдің цифрлық инфрақұрылымының тұрақтылығын қамтамасыз ету үшін қажетті инновациялық шешімдерге тікелей қол жеткізуді қамтамасыз етеді.

Palo Alto Networks құрылған сәтінен-ақ жаһандық киберқауіпсіздік индустриясын қалыптастыруда шешуші рөл атқарып келеді. 2007 жылы компания шешімдердің жаңа класы – келесі буын желіаралық экрандарын (NGFW) жасап шығарып, нарыққа шығарса, 2018 жылы киберқауіптерді тиімді анықтау және оларға ден қою саласында жаңа стандарттарды белгілейтін XDR (Extended Detection & Response) технологиясын ұсынды. Бұл шешімдер бүгінде бүкіл әлем бойынша ірі корпорациялар мен мемлекеттік ұйымдарда кеңінен қолданылады.

Қазіргі уақытта мемлекеттік органдар мен аса маңызды инфрақұрылым нысандарының мамандары Palo Alto Networks компаниясының Cortex XDR және XSOAR сияқты инновациялық платформаларын, жасанды интеллектіні қорғау технологияларын, ЖИ қолдауы бар жаңа буын желіаралық экрандарын, сондай-ақ корпоративтік ресурстарға қауіпсіз қолжетімділікті қамтамасыз ететін заманауи SASE және ZTNA 2.0 архитектураларын белсенді түрде сынақтан өткізіп, енгізуде. Ақпараттық қауіпсіздіктің жедел орталықтарын құруға арналған жаңа буын құралдарын қолдану инциденттерге уақытылы ден қойып қана қоймай, қауіп-қатерлерді проактивті мониторингілеу және кибершабуылдарды автоматты түрде бұғаттау үшін жасанды интеллектіні пайдалануға мүмкіндік береді.

Техникалық жарақтандырумен қатар ауқымды білім беру науқаны жүріп жатыр. Palo Alto Networks киберқауіпсіздік академиясы еліміздің бес жетекші жоғары оқу орнының студенттері үшін өз есігін айқара ашты, олардың қатарында Қазақстан-Британ техникалық университеті, SDU University, АЭжБУ, Astana IT University, сондай-ақ Coventry және De Montfort халықаралық университеттері бар. Болашақ мамандар киберқауіпсіздік және жасанды интеллект саласындағы шешімдермен жұмыс істеуді меңгерсе, министрліктер мен ұлттық компаниялардың қазіргі инженерлері халықаралық киберқауіпсіздік стандарттарына сәйкес кәсіби қайта даярлаудан өтуде.

Халықаралық тәжірибе алмасу да ынтымақтастықтың маңызды бөлігіне айналды. Қазақстандық делегация CERT ұлттық орталығы базасында мемлекеттік және аса маңызды нысандарды қорғаудың үздік тәжірибелерін зерделеу үшін Әзербайжанға барып қайтты. Дербес деректерді бақылау тетіктеріне және GDPR стандарттарын енгізуге ерекше назар аударылды. Бұл тәжірибе бұлттық шешімдердің қауіпсіздігі және маңызды цифрлық нысандарды ЖИ көмегімен жасалған қауіптерден қорғау жөніндегі жаңа заңнамалық бастамалардың негізіне алынады.

Барлық жинақталған әзірлемелер мен пилоттық жобалардың нәтижелері 7 сәуірде Астанада өтетін Innovation Day бейіндік іс-шарасында сарапшылар қауымдастығына таныстырылады. Бұл Қазақстанда ең жоғары әлемдік стандарттар бойынша қорғалған қауіпсіз және инновациялық цифрлық ортаны құру жолындағы тағы бір қадам болмақ.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.