Қазақстан мен Қырғызстан сыртқы саяси байланыстарын нығайтып отыр

Келіссөз барысында тараптар саяси, сауда-экономикалық, көліктік-логистикалық, су-энергетикалық және мәдени-гуманитарлық салалардағы екіжақты ынтымақтастықтың қазіргі жағдайы мен болашағын, сондай-ақ тараптардың аймақтық және халықаралық ұйымдар аясындағы өзара іс-қимылын талқылады.

Ермек Көшербаев пен Жээнбек Кулубаев екі мемлекет басшыларының қолдауы мен саяси ерік-жігерінің арқасында сенімді саяси диалогтың жоғары деңгейін атап өтті, сондай-ақ екіжақты ынтымақтастықты одан әрі нығайту және кеңейтуге деген берік ниеттерін растады.

Тараптар сауда-экономикалық байланыстарды кеңейту әлеуетін талқылады. Бірлескен инвестициялық жобаларды жүзеге асыру мәселелеріне баса назар аударылды, оның ішінде шекаралас аймақта өнеркәсіптік сауда-логистикалық кешен құру, сондай-ақ Алматы облысында көкөніс-жемісті сақтауға арналған көтерме-үйлестіру орталығын құру, Ыстықкөл-Алматы балама тасжолын салу және қазақ-қырғыз шекарасында шекара өткелдерін жаңғырту бар.

Кездесуде сондай-ақ энергетика және су ресурстары, көлік және логистика саласындағы практикалық өзара әрекеттестік, үкіметаралық келісім негізінде Қазақстаннан Қырғызстанға мұнай және мұнай өнімдерін жеткізу тетігін әзірлеу мәселелері қаралды. Ауыл шаруашылығы және өнеркәсіптік кооперация саласында аймақаралық ынтымақтастықтың іске асырылмаған әлеуетін зерттеу бойынша келісімге қол жеткізілді.

Осыған дейін Қазақстан мен Қырғызстан СІМ басшылары телефон арқылы сөйлескенін жаздық.

Басшылар өткен жылды қорытындылап, бауырластық пен тату көршілік рухындағы қазақ-қырғыз одақтастық қатынастарының жүйелі әрі орнықты дамып келе жатқанын атап өтті.