Қазақстан мұнай өңдеу көлемін 40 миллион тоннаға дейін жеткізуді жоспарлап отыр

АСТАНА, 15 желтоқсан - Sputnik. Энергетика министрлігі Қазақстан мұнай өңдеу көлемін 40 миллион тоннаға дейін жеткізетінін хабарлады.

Министрліктің мәліметінше, қазіргі уақытта елімізде жылына шамамен 90-100 миллион тонна мұнай өндіріледі.

"Біз шикізатқа негізделген экономикадан көмірсутек шикізатын терең өңдеуге көшуіміз керек. Біз мұнай өңдеу қуатын жылына 39-40 миллион тоннаға дейін арттыруымыз қажет. Бұған, біріншіден, қолданыстағы мұнай өңдеу зауыттарының әлеуетін барынша арттыру және жаңа мұнай өңдеу кешенін салу арқылы қол жеткізіледі", - деді энергетика министрлігінің мұнай тасымалдау және өңдеу департаменті директорының орынбасары Талғат Макуов.

Талғат Макуовтың айтуынша, жаңа мұнай өңдеу зауытын 2028 және 2040 жылдар аралығында салу жоспарланып отыр. Зауыт заманауи отын және мұнай-химия конфигурациясымен жабдықталады. Ол икемді схема бойынша жұмыс істейтін болады және ағымдағы нарықтық сұранысқа байланысты дәстүрлі отындарды (бензин, дизель және реактивті отын) және жоғары сұранысқа ие мұнай-химия өнімдерін (бензол, ароматика, альдегидтер және т.б.) өндіреді.