Қазақстан су шаруашылығы саласындағы ұлттық саясатты үнемі жетілдіріп келеді министр

— Қазақстан су шаруашылығы саласындағы ұлттық саясатты үнемі жетілдіріп келеді. Жаңа Су кодексі қабылданды. Құжатта су ресурстарын басқарудың заманауи тәсілдері қамтылған. Сондай-ақ, онда суды үнемдеу мәселелеріне ерекше назар аударылған. Біз суды ауыл шаруашылығы, өнеркәсіп және тұрмыстық секторда тиімді пайдалану мәдениетін қалыптастыруды басым міндет ретінде қарастырамыз, — деді министр.

Ведомство басшысы атап өткендей, алқаптарға заманауи су үнемдеу технологияларын енгізу жұмысы белсенді жүріп жатыр.

— 2030 жылға қарай 1,3 млн гектарға дейінгі суармалы жерлерді осындай технологиялармен қамту жоспарланып отыр. Қазақстанның Су кодексінде 2030 жылға қарай тиісті сүзгіден өткен суды қайта пайдалану үлесін 13%-дан 28%-ға дейін ұлғайту міндеті қойылған, — деп тоқталды Нұржан Нұржігітов.

Сонымен қатар, экологиялық білім беру және суды үнемдеу мәдениетін дамытуға бағытталған халықаралық жобалар іске асып жатыр.

— Халықаралық әріптестердің қолдауымен «Су және білім беру» жобасы жүзеге асуда.
Осылайша, Қазақстан су үнемдеуді өңірдің су қауіпсіздігі мен орнықты дамуын қамтамасыз етуге қауқарлы маңызды құрал ретінде қарастырады, — деп мәлім етті министр.

Еске салайық, таяуда Kazinform агенттігіне сұхбат берген өзбекстандық сарапшы Вадим Соколов аймақтағы су тапшылығы биыл да күрделі екенін айтқан еді.