Қазақстан табиғаты Кореяда көрсетілді

Қазақстанның көрікті жерлерін Оңтүстік Кореяның миллиондаған телекөрермені тамашалады. Елімізге арналған бағдарлама жергілікті телеарнада шықты.

Кореялық түсірілім тобы Алма-Арасан шатқалында, Бозжыра алқабында және басқа да көптеген көрікті жерлерге саяхаттаған. 

Кореялық EBS телеарнасының түсірілім тобы Қазақстанда 17 қазаннан бастап 20 күндей жұмыс істеді. Алматы облысында  Алма-Арасан ыстық бастауларына шомылып, домбыра жасау шеберханасын көріп, орманшының үйінде түнеді. Маңғыстау облысындағы Бозжыра журналистер үшін нағыз жаңалық болды. Олар бұл алқапты корей телевидениесінде алғаш рет көрсетті.

Ким Сан Ук, тілші:

- Біз жұлдыздарды тамашалау үшін Бозжырада кемпинг ұйымдастырдық. Бұл керемет болды. Кореяда бір уақытта мұндай көп жұлдызды көру мүмкін емес. Қазір Қазақстанда туристік инфрақұрылым жақсы дамып келеді. Маңғыстау, Алтай және Алматы төңірегіне саяхат өте жақсы болды. Ешқандай қолайсыздық сезінген жоқпыз.

Жиһанкездер көрермендерге өз тәжірибелері туралы айтып, тұрғындармен тілдесті. Ұлттық тағамдардан дәм татты. Алматыда қонақтарға ет асса, Ақтауда дастарханға фишбармақ қойылған. Саяхатшылар: «Жергілікті жемістердің дәмі де тіл үйіреді», – дейді.

Джин Ён Ман, бейнеоператор:

- Тіпті мейрамханада жүрсең де, өзіңді үйдегідей сезінесің. Еті өте дәмді. Қай жерден тамақтансақ та, бәрі дәмді болды. Адамдар табиғатпен үйлесімде өмір сүреді, сондықтан олар күйзеліске көп ұшырамайтын сияқты көрінді. Шыны керек, кеткіміз келмеді. Кореяда біз үнемі «электронды күйзеліспен» өмір сүреміз. 

«Әлемдік тақырыптық саяхат» — корей телевидениесіндегі ең рейтингі жоғары және ең ұзақ шығып келе жатқан бағдарламалардың бірі. Ол 2008 жылдан бері эфирге шығады. Оның интернеттегі роликтерін бірнеше миллион адам тамашалайды. Бағдарлама авторлары Қазақстанға тағы саяхаттауды жоспарлап отыр. Бұл жолы олар Оңтүстік Кореяның жылы, қарсыз қысында жетіспейтін қысқы демалыс мүмкіндіктерін көрсетпекші.

Авторы: Владислав Цой, Ольга Лян