Қазақстан темір жолы жыл соңына дейін IPO ға шығуды жоспарлап отыр

«Қазақстан темір жолы» ұлттық компаниясы акцияларын көпшілікке ұсынуға дайындық жұмыстарын жалғастырып жатыр.
Компанияның IPO-сы жыл соңына дейін өтуі мүмкін. Бұл туралы Үкімет отырысынан кейін өткен брифингте Талғат Алдыбергенов мәлімдеді.

Оның айтуынша, қазіргі уақытта Қазақстан темір жолы мен Самұрық-Қазына IPO-ға дайындық жұмыстарын бірлесіп жүргізіп жатыр.

Компания акцияларын бір мезгілде бірнеше қор нарығында орналастыру көзделуде. Атап айтқанда, IPO-ны үштік листинг форматында өткізу жоспарланған. Бұл акциялардың бір уақытта Қазақстандағы және екі халықаралық қор биржасындағы саудаға шығарылуын білдіреді.

«IPO-ны үштік листинг форматында өткізу жоспарланып отыр. Халықаралық алаңдар ретінде Лондон мен Гонконг қарастырылып жатыр. Сондай-ақ Қазақстан қор нарығы да қатысуы мүмкін», – деді Талғат Алдыбергенов.

Сарапшылардың пікірінше, ұлттық компанияның IPO-ға шығуы теміржол саласына қосымша инвестиция тартуға, корпоративтік басқару сапасын арттыруға және қаржылық ашықтықты күшейтуге мүмкіндік береді.

Айта кетейік, соңғы жылдары Қазақстанда мемлекеттік компанияларды жекешелендіру және олардың акцияларын қор нарығына шығару бойынша бірқатар бастамалар жүзеге асырылып келеді. Осы тұрғыдан алғанда, «Қазақстан темір жолының» IPO-сы елдегі капитал нарығын дамытудағы маңызды оқиғалардың бірі болуы мүмкін.