Қазақстан Украина футболын қолдау бағдарламасына қосылды

UEFA мүшелері, оның ішінде Қазақстан да, Украина балаларын қолдауға арналған «Достық шеңбері» жобасына қатысады, деп хабарлайды Aikyn.kz Украинаның футбол қауымдастығының баспасөз қызметіне сілтеме жасап.

Мәліметке сәйкес, жобаға қазірдің өзінде УЕФА-ға мүше 27 ел қосылған. Бастама футболдың шекараны жойып, соғыс жағдайында да жас футболшыларды қолдауға мүмкіндік беретінін көрсеткен.

Жобаға қатысушы футбол қауымдастықтары бір жыл бойы украиналық балалар командаларына, футбол мектептері мен әуесқой клубтарға көмек көрсетеді. Атап айтқанда, футбол формасы, киім-кешек, доптар және жаттығу құралдары жіберіледі.

Футбол жабдықтары Украинаның футбол қауымдастығы ұйымдастыратын бұқаралық футбол жобаларына қатысатын мектептер мен әуесқой клубтарға табысталады. Ұйым өкілдерінің айтуынша, «Достық шеңбері» жобасы Украина футболын қолдауға және балалардың дамуына қолайлы орта қалыптастыруға бағытталған.