Қазақстан университеті ЖИ бойынша грант ұтып алды

Өзбекәлі Жәнібеков атындағы Оңтүстік Қазақстан педагогикалық университеті CAREC институтының халықаралық гранттық байқауының жеңімпазы атанды. Бұл – отандық университеттің ғылыми әлеуетін айқындаған әрі халықаралық серіктестіктің жаңа кезеңіне жол ашқан инклюзивті-цифрлық білім беруді дамытуға бағытталған маңызды қадам, деп хабарлайды Egemen.kz.

Фото: ҚР Ғылым және жоғары білім министрлігі

Осыған орай университетте Орталық Азия Өңірлік Экономикалық Ынтымақтастық (ОАӨЭЫ, CAREC) институтымен бірлескен «Инклюзивті білім беру үшін жасанды интеллектіні пайдалану: ОАӨЭЫ өңірі үшін масштабталатын модель» атты халықаралық іс-шара өтті. Шетелдік сарапшылар университеттің цифрлық және инклюзивті трансформация бағытындағы бастамаларына жоғары баға берді. Сонымен қатар ЖИ-дің бағдарламалау мен педагогикалық әдістемелерді жетілдірудегі рөліне ерекше назар аударып, ЖИ технологияларын білім беру үдерісіне енгізудің болашағы мен халықаралық ғылыми ынтымақтастықты дамыту жолдары талқыланды.

Ғылыми жиынға ҚР ҒЖБМ Жоғары және жоғары оқу орнынан кейінгі білім комитеті төрағасының м.а. Гүлжан Жарасова, CAREC институты Әлеуетті арттыру жөніндегі маман Стивен Хао Лю, Стэнфорд университетінің Жасанды интеллект саласының профессоры, livetech.ai компаниясының негізін қалаушысы Юнес Бенсуда Мурри, Назарбаев Университетінің Смарт жүйелер және жасанды интеллект институтының (ISSAI) бас директоры Хусейн Атакан Варол сияқты жасанды интеллект және инклюзивті білім беру саласындағы халықаралық және отандық сарапшылар қатысты.

ҚР Ғылым және жоғары білім министрлігінің мәліметінше қазіргі уақытта университетте инклюзивті білім берудің жаңа моделін ескере отырып, жаңартылған білім беру бағдарламалары әзірленді. Барлық білім беру бағдарламаларының 3-курс студенттері үшін «Білім беру процесінде жасанды интеллектіні қолдану» бойынша  пән енгізілді. Сонымен қатар жасанды интеллект және цифрлық технологиялар бағытында 3 мемлекеттік қаржыландырылатын гранттық ғылыми жоба жүзеге асады. 

АҚШ, Еуропа, Орталық Азия елдерінен келген халықаралық сарапшылардың тәжірибелері-идеялары негізінде инклюзивті білім беруге жасанды интеллектіні енгізудің аймақтық жол картасы әзірленіп, бүкіл Орталық Азия өңірінің білім кеңістігін жаңғыртуға жаңа серпін бермек.