Шымкентте 431 азамат қайтарымсыз грант алды

Шымкентте өз кәсібін ашқысы келген 431 азамат бірреттік қайтарымсыз грант алды, деп хабарлайды 24KZ. «Бұл жоспарланғаннан да көп», – дейді мамандар. Себебі кейбір тұрғындар қаржылық көмектен өз еркімен бас тартып, қаражат әлеуметтік осал топтағы жандарға берілген. Енді бұл бағдарламаның пайдасы қандай? Артықшылығы неде?

Көпбалалы әке Ерғали Бертаев 6 ай бұрын аяқкиім тігетін шеберхана ашқан. Ол ата-бабаларының бәрі он саусағынан өнер тамған шебер болғанын айтады. Ата жолын жалғастырып, дәстүр мен заманауи технологияны ұштастыруды көздейді. Мемлекеттік гранттың арқасында жаңа тігін машиналарын сатып алған.

Ерғали Бертаев, кәсіпкер:

- Қазіргі таңда бізде ер кісілердің аяқкиімін тігіп жатырмыз. Келешекте балаларға, қыздарға, аналарымызға көптеген түрін қоссақ деп жатырмыз. Заманның ағысына қарай әртүрлі үлгіде аяқкиімдер шығарамыз. Бұл жерде 5-6 адам жұмыс істейміз.

Кәсіпкер бүгінгі таңда ерлердің қысқы етіктерінің 15-20 түрін шығарады. Аяқкиімдердің барлығы таза былғарыдан тігіледі. Отбасылық кәсіп болғандықтан, Ерғалиға жұбайы Мөлдір де көмектеседі. Олар болашақта шағын кәсібін үлкен цехқа айналдыруға ниетті.

Мөлдір Дәрімбетова, Е. Бертаевтың жұбайы:

- Мен пішу, тігу жағын өзім істеймін. Қасымда тігіп, көмектесіп жатқан көмекші әпкелеріміз бар. Әйелдердің аяқкиімін тігу де ойымызда бар. Енді бастамақшы болған кәсіпкерлерге берер кеңесім – ештеңеден қорықпау. Тек талап керек, талап болса, мемлекеттен қолдау болады деп сенемін.

Қалалық Еңбек мобильділігі орталығы мамандарының айтуынша, грантқа өз бизнесін бастауға дайын адамдар жүгінген. Өтініш беруден бастап, барлығы электронды жүйе арқылы жүзеге асады. Комиссия қолынан іс келетін азаматтарға басымдық берген. Үміткерлердің де өз санаты бар.

Бекболат Әлиханов, қалалық Еңбек мобильділігі орталығы директорының орынбасары:

- Мүгедек балаларға қараушылар, мүгедектігі бар, бірақ еңбекке қабілетті адамдар, көпбалалы отбасылар, қоныс аударушылар, қандастар қатыса алады. Олардың мәртебелері жұмыссыз немесе жеке кәсіпкер ретінде тіркелген болуы керек. Бастау бизнес туралы сертификаты болуы керек.

Бірреттік берілетін қайтарымсыз грант сомасы 400 айлық есептік көрсеткіш немесе 1 млн 600 мың теңге. Бұл қаржыны көбіне тұрғындар үй жағдайында тігін шеберханасын, кондитерлік өнімдер және шағын қолөнер бұйымдарын шығаратын цех ашып, өз кәсібін дөңгелету үшін алады.

Авторлары: Жандос Жұмабек, Катерина Попкова, Нурмахан Мусатов