Жұманғарин инфляция мен халық табысына қатысты мәліметтерді жариялады

АСТАНА, 13 қазан – Sputnik. Инфляцияның баяулауы нәтижесінде халықтың нақты ақшалай табысының өсімі 0,7 пайызға дейін жетті. Бұл туралы премьер-министрдің орынбасары – ұлттық экономика министрі Серік Жұманғарин мәлімдеді, деп хабарлайды Sputnik Қазақстан тілшісі.

Қазақстанда жылдық инфляция қыркүйек айының қорытындысы бойынша 9,3 пайызға дейін баяулады. Тамызда бұл көрсеткіш 9,8 пайыз болған.

Вице-премьердің айтуынша, инфляцияның баяулауына азық-түлік тауарлары бағасының өсу қарқынының төмендеуі едәуір әсер еткен. Қыркүйекте азық-түлік тауарларының бағасы айлық мәнде 0,1 пайызға төмендеді.

"Инфляцияны тежеу – үкіметтің халықтың нақты табысын арттыру жөніндегі жұмысының бір бағыты. Инфляцияның баяулауы аясында биылғы жылдың екінші тоқсанында халықтың нақты ақшалай табысының өсімі бірінші тоқсандағы 0,1 пайыздан 0,7 пайызға дейін өсті", – деді Жұманғарин үкіметтің бүгінгі отырысында.

Айта кетері, бұған дейін Қазақстан экономикасы теріс факторларға қарамастан өсіп жатқаны хабарланған болатын.