inDrive компаниясы такси бағасының өсуіне қатысты түсініктеме берді

АЛМАТЫ, 13 қазан – Sputnik. inDrive такси сервисі Бәсекелестікті қорғау және дамыту агенттігінің бағаны негізсіз көтеруге жол бермеу туралы ескертуіне қатысты пікір білдірді.

Демалыс күндері "Яндекс" сервистеріндегі ақау салдарынан пайдаланушылар такси шақырудың балама платформаларына жаппай ауысып, inDrive қызметіне сұраныс айтарлықтай артқан. Соның салдарынан такси бағасы үш есеге жуық өскенін монополияға қарсы орган мәлімдеді.

inDrive баспасөз қызметінің хабарлауынша, жұма күні баға бір сағат ішінде, ал жексенбіде шамамен үш сағатта тұрақтандырылған.

"Қызметке сұраныс күрт артқан кезде бір сапардың орташа бағасы 519 теңгеден артық өспеді", – делінген компания хабарламасында.

Сонымен қатар компания жүктеме ең жоғары қалаларда комиссия мөлшерін төмендеткенін мәлімдеді.

Еске сала кетейік, Бәсекелестікті қорғау агенттігі сервиске бағаны негізсіз өсірмеуді және тұтынушы құқығын таптамауды ескерткен болатын.