Қазақстанда 2030 жылға дейін жаңа газ өңдеу зауыттары іске қосылады

Фото: primeminister.kz

Министрдің айтуынша, ішкі тұтынуға арналған тауарлық газ өндіру көлемі өткен жылы 27,4 млрд текше метр болса, 2032 жылға қарай бұл көрсеткіш 35,5 млрд текше метрге дейін артады.

«Өсім Қашаған мен Қарашығанақ кен орындарында жаңа газ өңдеу қуаттарын іске қосу есебінен қамтамасыз етіледі. Бұл газ тасымалдау инфрақұрылымын кеңейтіп, өңірлерді тұрақты газбен жабдықтауға мүмкіндік береді. 2027-2030 жылдар аралығында тауарлық газдың қосымша көлемі 1,6 млрд текше метрге, 2031 жылы – 2,3 млрд текше метрге, ал 2032 жылы 6,6 млрд текше метрге дейін жетеді», деді Ерлан Ақкенженов.

Газ саласындағы инфрақұрылымдық жобаларды белгіленген мерзімде аяқтау негізгі міндеттердің бірі екендігін атап өткен министр жыл соңына дейін «Бейнеу – Бозой – Шымкент» магистральдық газ құбырының бірінші кезеңін аяқтау жоспарланғанын айтты.

Президент: Аймақтағы мұнай-газ өндіретін жетекші мемлекет ретінде мықты инфрақұрылым қалыптастыруымыз қажет

Сондай-ақ министр өңірлерді тұрақты газбен қамтамасыз етуге мүмкіндік беретінін бірқатар зауыттар іске қосылатындығын атап өтті.

«2027 жылы Қашағанда қуаттылығы жылына 1 млрд текше метр болатын газ өңдеу зауыты және Жаңаөзенде қуаттылығы жылына 0,9 млрд текше метр болатын ҚазГӨЗ пайдалануға беріледі деп күтіліп отыр. 2030 жылға қарай Қашағанда қуаттылығы жылына 2,5 млрд текше метр болатын газ өңдеу зауыты, сондай-ақ Қарашығанақта қуаттылығы жылына 5 млрд текше метр болатын зауыт іске қосу көзделген. Осы жобаларды жүзеге асыру газды қайта өңдеуді ұлғайтуға, газ тасымалдау инфрақұрылымын кеңейтуге мүмкіндік береді», деді министр.

Ерлан Ақкенженов: Елімізді газдандыру деңгейін 80%-ға дейін жеткізу жоспарланып отыр

Еске сала кетейік, Мемлекет басшысы Қасым-Жомарт Тоқаев Парламент палаталарының бірлескен отырысында еліміздің энергетикалық және инфрақұрылымдық негізін нығайту мемлекеттік саясаттың басты міндеттерінің бірі екенін атап өтті. Президент экономиканың жаңа үлгісіне көшу үшін энергетикалық, инженерлік және көлік-логистикалық инфрақұрылымды жан-жақты дамыту қажеттігін айтты.