Қазақстанда 500 ге жуық Hyundai Palisade көлігі кері шақырылды

Hyundai компаниясының Hyundai Palisade кроссоверлеріне қатысты Қазақстанда сервистік науқан басталды.
Бұл туралы Astana Motors құрамындағы ресми дистрибьютор хабарлады. Мәліметке сәйкес, ел аумағында шамамен 500 көлік қауіпсіздік тексерісінен өтеді. Науқан артқы орындықтардың электр жетегін басқаратын бағдарламалық қамтамасыз етуді жаңартуға бағытталған.

Бұған АҚШ-тың Огайо штатында орын алған қайғылы оқиға себеп болған. Зерттеулер көрсеткендей, орындықтарды автоматты бүктеу жүйесі кей жағдайда кедергіні анықтамай, қозғалысты жалғастыруы мүмкін. Бұл әсіресе балалар үшін қауіп төндіреді.

Көлік иелеріне:

VIN-кодты ресми дилерлік орталықтарда тексеру; көлік тізімге кірсе, сервиске жазылу; бағдарламалық жаңартудан өту ұсынылады.

Мамандардың айтуынша, науқанға ресми емес жолмен әкелінген көліктер де қатыса алады. Диагностика мен бағдарламаны жаңарту тегін жүргізіледі.

Көлікті тексеру үшін 7007 бірыңғай нөміріне хабарласуға немесе жақын маңдағы ресми Hyundai орталығына жүгінуге болады.

Айта кетейік, бұған дейін Hyundai АҚШ пен Канадада осы ақауға байланысты 70 мыңнан астам көлікті кері шақырған болатын.