Қазақстанда алғаш рет құтқарушыларға арналған демалыс кешені салынып жатыр

Фото: ҚР ТЖМ

Бірінші кезеңде әкімшілік блоктың, капсулалық үйлердің, бассейндердің, спорт алаңдарының және серуендеу аймақтарының құрылысы қарастырылған. Алдағы уақытта кешен аумағында қонақ үй, SPA-орталық, теннис корты, пирс, воркаут-алаңы, дәмхана және отбасылық демалыс аймақтары салынады. Жоба құтқарушылар қызметінің ерекшеліктері мен жұмысынан кейін толыққанды қалпына келу қажеттілігін ескере отырып әзірленген.

Астаналық құтқарушылар жарылыстың алдын алды
База аумағында ҚР ТЖМ жедел-құтқару жасағы мен Апаттар медицинасы орталығы қызметкерлерінен құралған әмбебап құтқару бөлімшесін орналастыру да жоспарланған. Бұл тұрақты жедел әрекет ету дайындығын қамтамасыз етіп, жеке құрамның даярлығы мен қалпына келуіне қолайлы жағдай жасауға мүмкіндік береді.

Төтенше жағдайлар министрі Шыңғыс Әріновтың айтуынша, қызметкерлерге арналған әлеуметтік инфрақұрылымды дамыту ведомствоның басым бағыттарының бірі болып қала береді.

«Біз өз қызметкерлеріміз бен олардың отбасылары үшін лайықты жағдай жасауымыз керек. Құтқарушылар тәулік бойы қызмет атқарып, күрделі жағдайда жұмыс істейді. Олардың толыққанды қалпына келіп, жақындарымен уақыт өткізуіне мүмкіндік болуы тиіс», деді Шыңғыс Әрінов.

Астанада құтқарушылар лифт ішінде қалып қойған 5 адамды шығарып алды

Құрылыс аяқталғаннан кейін кешен ТЖМ қызметкерлері мен олардың отбасы мүшелеріне қолжетімді болады. Қазақстанның құтқарушылары үшін мұндай демалыс және қалпына келу форматы алғаш рет енгізіліп отыр.