​​Қазақстанда автомектептерге жаппай тексеру жүргізілді: ондаған кемшілік анықталды​

Ішкі істер министрлігі республика бойынша автомектептерге ауқымды тексеру жүргізді. Тексеру қорытындысы көңіл көншітпейді: өрескел заң бұзушылықтарға байланысты жүздеген оқу топтарының жұмысы тоқтатылды, деп хабарлайды Polisia.kz.

Бүгінгі таңда Қазақстанда 727 автомектеп жұмыс істейді. Тексеру нәтижесінде анықталғаны олардың көбі базалық қауіпсіздік талаптарын ескермеген.

Полицейлер анықтаған кемшіліктер:

Автодромдарда қажетті белгілер, таңбалар мен жарықтандыру болмаған;

Оқу автомобильдерінде техникалық ақау болып шықты;

59 ұйым техникалық байқаудан өтпеген және сақтандыру полисі жоқ көліктерді пайдаланған.

Нәтижесінде ІІМ Әкімшілік полиция комитеті 701 оқу тобының дайындығын тоқтатты.

ІІМ қазіргі уақытта ұйымдардың есебі «Автомектеп» ақпараттық жүйесінде жүргізілетінін еске салды. Бұл жүйенің көмегімен қазақстандықтар мына жайттарды өз бетінше тексере алады:

Берілген куәліктің заңдылығын;

Оқу бағдарламасының нормаларға сәйкестігін;

Оқу көлігінің ресми тіркелген-тіркелмегенін.

«Бір күндік мектептер» пайда болмау үшін Мәжіліске «Жол жүрісі туралы» заңға түзетулер енгізілген заң жобасы ұсынылды. Басты жаңалық — автомектептерді ашудың хабарлама беру тәртібінен рұқсат беру тәртібіне көшуі.

Бұл кәсіпкердің мемлекеттік органдарға ашылғаны туралы «хабарлама» беріп қана қоймай, алдымен өзінің материалдық базасы мен автопаркі барлық критерийлерге сәйкес келетінін дәлелдеп, ресми рұқсат алуы тиіс екенін білдіреді.

Бүгін, 11:14