Қазақстанда балалардың жазғы лагерьлеріне ескертусіз тексеру ұйымдастырылады

Жазғы сауықтыру маусымы қарсаңында Қазақстан Республикасы Денсаулық сақтау министрлігі балалардың қала сыртындағы лагерьлеріндегі санитариялық-эпидемиологиялық жағдайға бақылауды күшейтуде. 

Ведомство хабарлағандай, іс-шаралар кешені балалардың қауіпсіз демалуын қамтамасыз етуге бағытталған. Негізгі талаптарға қоршалған аумақтың болуы, үздіксіз сумен жабдықтау, кәріз жүйесі, жарықтандыру және желдету кіреді.

Барлық үй-жайлар таза жағдайда ұсталуы тиіс, рұқсат етілген дезинфекциялық құралдарды қолдана отырып, күнделікті тазалық жұмыстары жүргізілуі қажет.

Лагерьлерде сондай-ақ бес мезгіл тамақтану ұйымдастырылып, медициналық қызмет көрсетілуі тиіс.

Шомылатын орындарда су айдындары мен топырақтан сынамалар алынып, гигиеналық нормативтерге сәйкестігі зертханалық тексеруден өткізіледі. Маусым бойы су айдындары мен бассейндердегі судың жай-күйіне тұрақты мониторинг жүргізіледі.

2026 жылдың екінші жартыжылдығында Министрлік мемлекеттік бюджеттің есебінен қаржыландырылатын барлық балалар сауықтыру ұйымдарын мемлекеттік бақылаудың ерекше тәртібі шеңберінде тексереді.

Алғаш рет бекітілген тізімдер бойынша жоспарлы тексерулер тетігі енгізіледі, бұл тізімдер 10 мамырға дейін Комитеттің аумақтық бөлімшелерінің интернет-ресурстарында жарияланады.

Қосымша түрде жоспарлы тексерулер тізіміне енгізілмеген нысандарға барып тексеру арқылы жаңа бақылау форматы енгізілді.

Бұл ретте тексерулер алдын ала ескертусіз жүргізіледі, бұл лагерьлердің нақты жағдайын объективті бағалауға және дайындықтағы формалдылықты болдырмауға мүмкіндік береді.

Министрлік лагерь иелеріне нысандарды алдын ала дайындау, санитариялық-эпидемиологиялық қорытынды алу, персоналға қойылатын талаптарды сақтау және белгіленген сыйымдылықтан асырмау қажеттігін ескертеді.

Ата-аналарға санитариялық-эпидемиологиялық қорытындысы бар ресми тізімдегі лагерьлерді таңдау, бала денсаулығына назар аудару және алып жүретін адамдарды мүмкін болатын медициналық ерекшеліктер туралы хабардар ету ұсынылады.

Барлық бұзушылықтар фактілері бойынша азаматтар санитариялық-эпидемиологиялық бақылау комитетінің аумақтық бөлімшелеріне жүгіне алады.

Министрлік жазғы демалыс кезеңінде балалардың қауіпсіздігі мен денсаулығын қамтамасыз ету ерекше бақылауда екенін атап өтеді.

Жергілікті атқарушы органдардың мәліметі бойынша, биыл 199 лагерь, оның ішінде 20-сы – жыл бойы, 179-ы – маусымдық жұмыс істейді.

Бүгін, 17:59