Қазақстанда банкроттық ережелеріндегі маңызды жайт түсіндірілді

Азаматтық істер жөніндегі кассациялық сот ЖШС-де үлестің болуы Қазақстан азаматына сот арқылы банкроттық рәсімін қолданудан бас тартуға негіз болмайтынын түсіндірді, деп хабарлайды Tengrinews.kz.

ЖШС-дегі үлес бас тартуға себеп болды

Сотқа Х. есімді азамат сот арқылы банкроттық рәсімін қолдану туралы өтінішпен жүгінген.

"II топтағы мүгедек, онкологиялық аурумен ауыратын әйел өзін банкрот деп тануды сұраған. Оның берешегінің мөлшері 4,5 миллион теңгені құраған. Алайда бірінші және апелляциялық сатыдағы соттар өтініш берушінің ЖШС жарғылық капиталында 25,9 пайыз үлесі бар екенін алға тартып, бас тартқан", - делінген хабарламада.

Кассациялық сот басқаша шешімге келді. Серіктестік іс жүзінде екі жылдан астам уақыт бойы жұмыс істемейтіні, ал оның барлық мүлкі небәрі 103 мың теңгеге бағаланғаны анықталған.

Өтініш берушінің үлесі 26 677 теңгені құрады, бұл 4,5 миллион теңге қарызды өтеуге жеткіліксіз екені анық. Сонымен қатар әйел ЖШС-ға қатысудан табыс таппаған, ал оның жалғыз күнкөріс көзі мүгедектігі бойынша берілетін жәрдемақы болған.

"Іс бойынша анықталған мән-жайларға сүйене отырып, заңды тұлғада үлестің болуының өзі сот арқылы банкроттық рәсімін қолданудан бас тартуға негіз болмайтыны танылды. Мұндай істерді қарау кезінде мүліктің нақты құнын және борышкердің нақты төлем қабілеттілігін ескеру қажет", - делінген хабарламада.

Қарау қорытындысы бойынша кассациялық сот төменгі сатыдағы соттардың шешімдерін бұзып, қазақстандыққа қатысты сот арқылы банкроттық рәсімін қолданды.

Тағы оқыңыз: Несие төлемін сот және коллекторсыз қалай азайтуға болады: нұсқаулық

Google News арқылы жаңалықтарымызды қадағалаңыз