Қазақстанда ипотека бойынша банкроттық рәсімін өзгерту ұсынылуда

Қазақстанда ипотекалық қарыз алушылар үшін банкроттық ережелерін қатаңдату ұсынылып отыр. Мұндай бастаманы Сенаттың Қаржы және бюджет комитетінің отырысында Қазақстан қаржыгерлер қауымдастығы (ҚҚҚ) көтерді, деп хабарлайды TengriHome.

Поделиться

Қазақстанда ипотекалық қарыз алушылар үшін банкроттық ережелерін қатаңдату ұсынылып отыр. Мұндай бастаманы Сенаттың Қаржы және бюджет комитетінің отырысында Қазақстан қаржыгерлер қауымдастығы (ҚҚҚ) көтерді, деп хабарлайды TengriHome.

Жиында ҚҚҚ-ның мемлекеттік органдармен жұмыс жөніндегі директоры Бекжан Отарбаев ипотекалық несиелер бойынша жеңілдетілген соттан тыс банкроттық рәсімін жоюды ұсынды.

Анықтама: Соттан тыс банкроттық – бұл сотсыз жүргізілетін қарызды есептен шығарудың жеңілдетілген рәсімі. Азамат тек өтініш береді, мемлекет оның қарыздары мен мүлкін тексереді, егер шарттар сәйкес келсе, қарыздар сот процесінсіз кешіріледі.

Отарбаевтың айтуынша, қазіргі уақытта адам бес жылдан астам уақыт бойы несиесін төлемесе, шартсыз банкроттық мәртебесін ала алады. Бұл ретте қарыз көлемі, мүліктің бар-жоғы немесе банктің берешекті неліктен өндіріп үлгермегені ескерілмейді.

"Іс жүзінде көптеген кепілмен қамтамасыз етілген ірі қарыздарды өндіру ұзаққа созылатын жағдайлар кездеседі. 5 жыл ішінде қарызды өндіріп алу борышкерге қатысты қылмыстық іс қозғау, іздеу жариялау, кепіл мүлкіне қатысты көптеген тыйым мен шектеулердің болуы сияқты бірқатар объективті себептерге байланысты шектеулі", – деді ол.

ҚҚҚ өкілінің айтуынша, қазіргі заңнама банк "объективті себептермен" қарызды уақытында өндіріп ала алмаған жағдайда да, оны соттан тыс тәртіппен кешіруге мүмкіндік береді. Соның салдарынан адамдардың тіпті ипотекалық қарыздары да есептен шығарылып жатыр.

"Жоғарыда айтылғандарға байланысты, шартсыз соттан тыс банкроттық туралы тармақты өзгертіп, бұл рәсімді ипотекалық қарызы бар борышкерлерге қолданбауды ұсынамыз", – деді ол.

Енді бұл бастаманы мемлекеттік органдар зерттейді.

Бұған дейін біз Қазақстанда банкроттық ережелері өзгеретінін жазған едік. Енді ломбардтар алдындағы берешекті бұл жеңілдетілген рәсім арқылы есептен шығаруға болмайды, егер қарыз 1 600 АЕК-тен (2026 жылы шамамен 6,9 миллион теңге) аспаса және 5 жылдан астам уақыт төленбеген болса, өтініш тезірек – 1 айға дейінгі мерзімде қаралады.

Google News арқылы жаңалықтарымызды қадағалаңыз

Ипотека Несие Банкроттық баспана