Қазақстанда Черногорияның визалық орталығы ашылуы мүмкін не белгілі

Черногория бірқатар елдің азаматтары үшін кіру ережелерін өзгертіп, сонымен қатар визалық орталықтар желісін кеңейтіп жатыр. Соның ішінде Қазақстан да бар. Бұл туралы елдің Сыртқы істер министрлігі хабарлады, - деп жазады Tengri Travel.

Қазақстанда визалық орталық ашу жоспарланған

Черногория ұлттық визаға құжат тапсыруға болатын визалық орталықтар желісі кеңейетінін жариялады.

Қазіргі уақытта өтінімдерді Үндістан, Бангладеш, Қырғызстан, Әзербайжан, Түркия, Біріккен Араб Әмірліктері мен Ресейдегі VFS Global визалық орталықтары қабылдап жатыр.

Келесі кезеңде желіні одан әрі кеңейту жоспарланған. Жаңа визалық орталықтар ашылуы тиіс елдердің тізіміне Қазақстан да енді. Сондай-ақ олар Пәкістан, Қытай, Армения, Филиппин, Катар, Сауд Арабиясы, Бахрейн, Беларусь, Непал және Өзбекстанда пайда болады.

Болашақта бұл географияны Иордания, Кувейт, Таиланд және Индонезияға дейін кеңейту көзделіп отыр.

Сыртқы істер министрлігі бұл қадамның арқасында өтініш берушілер Черногория елшілігіне немесе консулдығына бармай-ақ, жақын маңдағы визалық орталыққа жүгіне алатынын атап өтті.

"Бұл өтініш берушілерге құжаттарын ең жақын маңдағы VFS визалық орталығына тапсыруға мүмкіндік береді. Осылайша Черногория елшілігіне немесе консулдығына бару қажеттілігі жойылып, виза рәсімдеу процесі айтарлықтай тиімді, ыңғайлы әрі қолжетімді болады", - деп хабарлады ведомство.

Сонымен қатар Черногория визалық режимін өзгертті. 2026 жылғы 23 шілдеде ел үкіметі қаулы қабылдады, оған сәйкес 2026 жылғы 1 қарашадан бастап Ресей, Беларусь, Қытай, Түркия және Сауд Арабиясы азаматтарына елге кіру үшін черногориялық виза қажет болады.

Сыртқы істер министрлігі бұл шешімнің елдің визалық саясатын Еуропалық Одақ ережелеріне толық сәйкестендіру қажеттілігімен байланысты екенін түсіндірді.

Черногория СІМ елдің визалық саясатын ЕО-мен сәйкестендіргенін хабарлады. Бұл Еуропалық Одаққа мүшелікке өту туралы келіссөздер аясындағы міндеттемелердің бірі, сондай-ақ реформалар бағдарламасын іске асыру шарттарының бірі болды.

Министрлік мәліметінше, бұл талапты орындау Черногорияға Батыс Балқан елдеріне арналған Еуропалық Одақтың өсу жоспары аясында шамамен 4 миллион еуро алуға мүмкіндік береді.

"Бұл біздің еліміздің еуропалық интеграцияға деген нық ұстанымын растайды", - деп мәлімдеді Сыртқы істер министрлігі.

Сонымен қатар, Еуропалық Одақтың ақпараттық жүйелерімен үйлесімді және Шенген аймағының қауіпсіздік стандарттарына сәйкес келетін жаңа визалық ақпараттық жүйені құру жұмыстары жалғасып жатыр.

Жобаның түпкі мақсаты - электрон виза (e-Visa) жүйесін іске қосу. Ол құжаттарды толықтай онлайн тапсыруға мүмкіндік беріп, өтінімдерді қарау мерзімін қысқартуы тиіс.

Министрлік жаңа талаптарды енгізумен қатар, виза алуды барынша жеңілдету шаралары да қабылданып жатқанын қадап айтты.

"Сыртқы істер министрлігі бұл өзгерістердің ықтимал жағымсыз салдарын азайтуға бағытталған шараларды проактивті әрі жүйелі түрде жүзеге асырып жатыр. Сонымен бірге черногориялық визаны алу процесінің барынша қарапайым әрі қолжетімді болуын қамтамасыз етеді", - делінген ведомство хабарламасында.

Айта кетейік, қазақстандықтар Черногорияға 2026 жылдың қазанына дейін визасыз 30 күнге дейінгі мерзімге бара алады. Ұзақ сапарлар үшін виза рәсімдеу қажет болады. Бұған дейін СІМ баспасөз қызметі уақытша визасыз режимнің енгізілгені туралы хабарлаған болатын.

Черногория - Балқан түбегіндегі Адрия теңізінің көркем жағалауында орналасқан ел. Мұнда жағажай демалысын тауға саяхатпен ұштастыруға болады - теңіз сүйер қауымға да, табиғат пен тыныштықты іздеушілерге де бағыттар жеткілікті.
Ең танымал бағыттардың қатарында Будва ривьерасы, Котор шығанағы, Дурмитор ұлттық паркі және Скадар көлі бар. Жергілікті асхана Жерорта теңізі мен Балқан дәстүрлерін біріктіреді.

Тағы оқыңыз: Құжаттан бастап, жағажайға дейін: Черногорияға сапар алдында нені ескеру керек?

Google News арқылы жаңалықтарымызды қадағалаңыз