Қазақстанда еңбек шартын тіркемегендерге жауапкершілік енгізілді

Қазақстанда 12 наурыздан бастап еңбек шарттарын уақытында немесе толық тіркемеген жұмыс берушілерге жауапкершілік енгізілді, – деп хабарлайды Aikyn.kz сайты.

Осыған байланысты компаниялар HR Enbek жүйесіне деректерді жаппай енгізе бастады.

10-11 наурыз күндері тәулігіне 100 мыңға дейін еңбек шарты тіркеліп, жүйеге уақытша жүктеме түсті. Қазір платформаның жұмысы толық қалпына келтірілді.

Еңбек министрлігінің мәліметінше, 12 наурызға дейін үлгермеген жұмыс берушілер деректерді әлі де енгізе алады. Айыппұл автоматты түрде салынбайды.

Жауапкершілік тек тексеріс нәтижесінде қолданылады. Алдымен заңбұзушылықты жою туралы нұсқама беріледі, содан кейін ғана шара қабылдануы мүмкін.

Жұмыс берушілер еңбек шарттары туралы мәліметтерді жүйеге уақытында енгізіп, үнемі жаңартып отыруы тиіс.

Бұған дейін айыппұлдар мынадай бұзушылықтар үшін қарастырылған:

– деректерді енгізбеу немесе кешіктіру

– толық емес немесе қате ақпарат беру

Айыппұл мөлшері 120 мыңнан 648 мың теңгеге дейін, ал қайталанған жағдайда екі есеге өседі.

Қазіргі таңда жүйеде 6,5 миллион еңбек шарты тіркелген. Сұрақтар бойынша 1414 байланыс орталығына жүгінуге болады.