Қазақстанда ислам ипотекасы іске қосылады

Отбасы банк 2026 жылдың күзінде шариғат талаптарына сай жаңа ипотекалық өнімді іске қосуды жоспарлап отыр.
Бұл туралы банк басшысы Ләззат Ибрагимова ҚазАқпарат агенттігінің BIZDIÑ ORTA подкастында мәлімдеді.

Оның айтуынша, ислам ипотекасының құқықтық негізін қалыптастыратын заңнамалық түзетулерге осы маусым айының соңына дейін қол қойылады. Бұл өзгерістер «Отбасы банкіне» исламдық қаржыландыру қағидаттарымен ресми жұмыс істеуге мүмкіндік береді.

Кейін тамыз айында тиісті лицензия алу жоспарланған. Ал алғашқы ислам ипотекасы қыркүйек айының соңына дейін немесе 1 қазанға дейін рәсімделуі мүмкін.

Жаңа өнімнің негізгі ерекшелігі – дәстүрлі пайыздық мөлшерлемеден толық бас тарту. Ислам қаржы жүйесінде «рибаға», яғни пайыздық сыйақы алуға тыйым салынғандықтан, банк клиенттерге басқа тетіктер ұсынбақ.

Атап айтқанда, азаматтар пайызсыз депозит ашып, кейін сыйақысыз қаржыландыру арқылы баспана ала алады. Сонымен бірге банктің қазіргі тұрғын үй жинақтау жүйесі сақталады, тек клиент пен банк арасындағы келісімдер исламдық қаржы стандарттарына бейімделеді.

Бұған дейін Ләззат Ибрагимова тұрғын үйді инвестиция ретінде сатып алу көбейіп кеткенін айтып, бірнеше пәтері бар азаматтарға салынатын салықты арттыруды ұсынған еді.