Қазақстанда көкжөтелмен сырқаттанғандар саны 2,4 есеге төмендеді

АСТАНА, 18 мамыр – Sputnik. 2026 жылы Қазақстанда көкжөтелмен сырқаттанушылық 2,4 есеге төмендеді, деп хабарлады денсаулық сақтау министрлігі.

Министрлік мәліметінше, 2026 жылдың басынан бері Қазақстанда көкжөтелдің 83 жағдайы тіркелді. Бұл 2025 жылдың осы кезеңімен салыстырғанда сырқаттанушылықтың 2,4 есеге төмендегенін көрсетеді.

"Осы жылдың 4 айында көкжөтелге қарсы жоспарлы вакцинациямен 178,9 мың бала қамтылды, оның ішінде 1 жасқа дейінгі 51,6 мың бала, 1 жастағы 46,7 мың бала және 6 жастағы 80,7 мың бала", - деп жазылған хабарламада.

Сонымен қатар, белгіленген мерзімде екпе алмаған балаларды толықтыра иммундау жұмыстары жалғасып жатыр.

Жыл басынан бері екпе алмағандар қатарындағы 18 жасқа дейінгі 64,6 мың бала мен жасөспірім көкжөтелге қарсы вакцинациямен қосымша қамтылды. Жұмыс қолда бар вакциналар көлемін пайдалана отырып жүргізілуде және жалғасатын болады, дейді министрлікте.