Қазақстанда кондитерлік өнімдерді цифрлық таңбалау бойынша пилоттық жоба басталды

Қазақстанда 2026 жылғы 1 маусымнан бастап кондитерлік өнімдерді цифрлық таңбалау бойынша пилоттық жоба іске қосылды.
Жоба бір жылға созылып, 2027 жылғы 1 маусымға дейін жалғасады. Пилоттық жоба тауарлардың цифрлық қадағалануын қамтамасыз ету, контрафактілік өнімдердің айналымын азайту және жеткізу тізбегінің ашықтығын арттыру мақсатында жүзеге асырылып отыр.

Жобаға еліміздің және халықаралық нарықтағы ірі кондитерлік компаниялар қатысуда. Олардың қатарында отандық «Баян Сұлу» ЖШС мен «Лотте Рахат» ЖШС, сондай-ақ «Марс Казахстан» ЖШС, «Ферреро Казахстан» ЖШС, «Мон’дэлис Казахстан» ЖШС және «Нестле Фуд Казахстан» ЖШС бар. «Атамекен» ҰКП мәліметінше, «Баян Сұлу» мен «Рахат» елдегі кондитерлік өнім өндірісінің шамамен жартысын қамтамасыз етеді. Бұл пилоттық жобаның нарықтағы негізгі ойыншыларды қамтып, оның нәтижелерінің объективті болуына мүмкіндік береді.

Пилоттық кезеңде қантты және ұннан жасалған кондитерлік өнімдер, шоколад, печенье, вафли, мармелад, джемдер, жеміс-жидек және жаңғақ пасталары секілді өнімдер таңбаланады.

Жоба барысында таңбалау жүйесінің техникалық мүмкіндіктері тексеріліп, өндірістік және логистикалық процестерге енгізу тетіктері пысықталады. Сонымен қатар бизнес үшін ықтимал тәуекелдер мен нормативтік-құқықтық базаны жетілдіру қажеттілігі бағаланады.

Мамандардың айтуынша, цифрлық таңбалау тұтынушыларды заңсыз және сапасыз өнімдерден қорғауға, нарықтағы адал бәсекелестікті қалыптастыруға әрі тауар қозғалысының толық ашықтығын қамтамасыз етуге мүмкіндік береді. Міндетті таңбалауды енгізу туралы түпкілікті шешім пилоттық жобаның қорытындылары мен нарық қатысушыларының ұсыныстары негізінде қабылданады.

Қазіргі уақытта Қазақстанда аяқ киім, темекі өнімдері, дәрілік заттар, сыра, мотор майы және киік мүйіздері міндетті цифрлық таңбалауға жатады. Сонымен қатар биыл күзден бастап биологиялық белсенді қоспалар, жеңіл өнеркәсіп өнімдері мен зергерлік бұйымдарды таңбалау кезең-кезеңімен енгізіледі. Ал өсімдік майы, тұрмыстық химия және косметика өнімдері бойынша пилоттық жобалар жалғасуда.