Қазақстанда кондитерлік өнімдердің түпнұсқалығын QR код арқылы тексеруге болады

Қазақстанда кондитерлік өнімдерді цифрлық таңбалау бойынша пилоттық жоба іске қосылды. Бір жыл ішінде шоколад, кәмпит, печенье мен мармелад қаптамасына арнайы Data Matrix коды қойылады, - деп хабарлайды Tengrinews.kz тілшісі 24KZ-ке сілтеме жасап.

Ауқымды тәжірибенің басты мақсаты – ішкі нарықты заңсыз импорттан толық қорғау және тұрғындарға азық-түлік өнімдерінің қауіпсіздігін қамтамасыз ету.

Пилоттық жоба сәтті өтсе, сатып алушылар дүкендерде QR-код арқылы өнімнің құрамын және өндірушісін тексере алады.

Салалық қауымдастықтардың бағалауынша, шағын сауда орындарының сөрелерінде шығу тегі күмәнді тауар көп.

Таңбалау процесіне "Рахат", "Баян Сұлу" фабрикалары, сондай-ақ, Mars, Ferrero, Nestlé сияқты ірі халықаралық дистрибьюторлар қосылған.

"Меніңше, бүгінде еліміздегі қазіргі жағдайды ескерсек, азық-түлік өнімдерінің 70-80 пайызы – жалған, контрабандалық және контрафактілік тауарлар. Өйткені олар заңсыз әкелініп жатыр. Кішкентай дүкендерде қандай өнімдер сатылып жатқанына назар аударыңыздаршы – қытайлық, таңбасы, еш белгісі жоқ тауарлар. Бағасы төмен, себебі бұл тауар контрабандалық жолмен келген. Ол сынақтан да, тіркеуден де өтпеген", - деді Қазақстан Республикалық тұтынушылар қауымдастығы төрағасының орынбасары Тұрсын Жақпарова.

Жыл бойы таңбалауға белсенді дайындық жүргізіледі. Мамандар кондитерлік өнімдердің конвейерден сөреге дейінгі жолын толық зерттейді. Логистиканы тексеру және әрбір отандық кәсіпорын үшін ең тиімді әрі ыңғайлы тәсілді табу мақсатында цифрлы кодты енгізудің түрлі әдістері іс жүзінде сыналады. Экономиканың өзге секторларында ұқсас құралдарды қолдану тәжірибесі өзінің фискал және әлеуметтік тиімділігін дәлелдеп үлгерді.

"Бүгінде цифрлық таңбалаудың өз жемісін беріп, тиімді жұмыс істеп жатқанын нақты айтуға болады, бұған мысал ретінде темекі өнімдері мен дәрі-дәрмектерді келтіруге болады. Егер темекі өнімдері бойынша акциздерден бюджетке түсетін түсімдер айтарлықтай өссе, заңсыз өнімдер де тиімді анықтала бастады. Дәрі-дәрмек бойынша бюджетте қосымша үнемдеу байқалады, өйткені таңбалау арқылы дәрілік заттарды жоспарлау мүмкіндігі туды, мемлекет 85 миллиард теңгеге жуық қаражатты үнемдеді", - деді таңбалаудың бірыңғай операторы жобасының жетекшісі Назгүл Төрашева.

Жоба сәтті деп танылған жағдайда, кондитерлік өнімдерді таңбалау айналымы бәріне, соның ішінде үшінші елдерден келетін импорт үшін де міндетті болады. Цифрлық белгілерге тапсырыс бермес бұрын, әрбір зауыт Ұлттық каталогта егжей-тегжейлі карта тіркеуге міндеттеледі.

Нәтижесінде кез келген қазақстандық eGov mobile және арнайы қосымша арқылы сканерлеу барысында өнімнің нақты құрамын, өндірілген елін және жарамдылық мерзімін лезде біліп, өз отбасы үшін қауіпсіз өнімдерді сатып ала алады.

Google News арқылы жаңалықтарымызды қадағалаңыз