Қазақстанда мал дәрігерінің жалақысы көбеюі мүмкін

Мал дәрігерінің мұңы көп. Жұғымсыз жалақы, тозығы жеткен техника, ауыр жүктеме мамандарды мезі етті. Сенатта өткен Үкімет сағатында депутаттар осылай деп ветеренария саласындағы мәселелерді көтерді.

Олардың айтуынша, кадр тапшылығы күшейіп барады. Ал цифрлық платформалардың толық интеграцияланбауы жұмыс тиімділігін бәсеңдетіп отыр. Ал Ауыл шаруашылығы министрлігі ет өнімдерін цифрлық тұрғыда қадағалауды енгізіліп жатқанын хабарлады. Жүйе мектеп, балабақша және ауруханаларда тексеріліп жатыр. Әр өнім QR-коды бар электронды анықтамамен бірге жүреді. Осылайша мал қорада жүргеннен бастап, тұтынушы тамағына түскенге дейінгі жолды бақылауға болады. Сондай-ақ 2027 жылдан бастап мал дәрігерлерінің жалақысы өсуі мүмкін. Егер жаңа заң жобасы қолдау тапса, ауылдағы ветеринарлар 400 мың теңге айлық алады.

Аманғали Бердалин, ҚР ауыл шаруашылығы вице-министрі:

- Ветеринария туралы заңды Мәжіліске енгізуіміз керек. Егер қаржы талап етсе, республикалық бюджеттен өзінің қолдауын табу керек. Сондықтан біз заңға енгіздік. Республикалық бюджеттен қолдау алдық. Біз 1 қаңтар 2027 жылдан бастап төленеді деп отырмыз.

Елде 38 млн мал тіркелген

Аяқтыны жарылқаймыз деп тұяқтыдан айырылып қалмайық. Әлемде мал ауруы өршіп кеткен. Ғалымдардың айтуынша, жаңа инфекциялардың 70%-і жануарлардан тарайды. Дүниежүзілік жануарлар саулығы ұйымы 90-нан астам аса қауіпті ауруды анықтаған. Ал ел аумағында 23 дертке қарсы вакциналау жүргізіледі. Қазір елде 9 млннан аса ірі қара мал, 24 млн-ға жуық ұсақ мал бар. Оған қоса 4,7 млн жылқы мен 302 мың түйе тіркелген. Оған 569 шошқаны тағы қосыңыз. Бірақ жауаптылар: «Бәрі бақылауда», – дейді. Елде мал арулары ошағы 51% азайған. Сондай-ақ дертке қарсы қолданылатын отандық вакциналардың үлесі көбейіпті. Алдағы екі жылда өңірлерде жаңа ветпункттер мен станциялар салынады. Осы мақсаттарға бюджеттен 66 миллиард теңгеден астам қаражат бөлінеді. Одан бөлек халықаралық сарапшылармен кеңесе келе, мал ауруына қарсы шараларды қайрау мәселесі де пысықталып жатыр.