Қазақстанда қаржылық технологиялар индустриясы қарқынды дамып келеді

Биыл Астана халықаралық қаржы орталығында лицензияланған цифрлық активтер биржаларында жасалған сауда көлемі төрт есе өсіп, 5,5 миллиард АҚШ долларына жуықтады. 

Көрсеткіш криптовалюта және өзге сандық қаржы құралдары арқылы жасалған операцияларды қамтиды. Бұл туралы Сингапурда өтіп жатқан финтех-фестивальде Астанадағы орталық өкілдері мәлімдеді. Іс-шараға әлемнің 130-дан астам елінен 60 мыңнан астам қатысушы келген. Алаңда қазақстандық компаниялар өз қызметтерін таныстырып, қаржы, IT, сақтандыру және венчурлік жобалар саласында жаңа серіктестік орнатуда. 

Алтай Слямов, АХҚО Қаржылық қызметтерді реттеу комитетінің департамент директоры:

- Сингапур экосистемасында қызмет ететін компаниялар, оның ішінде цифрлық және финтех саласында жұмыс істейтіндер, біздің орталығымыздың халықаралық құнды қағаздар ұйымының берген есебіне сәйкес, озық ретінде бағаланған реттеуші үлгімізге үлкен қызығушылық танытып отыр. Осы аймақтағы компаниялар біздің орталығымызда өздерінің бизнестерін жалғастырып, жаңа компаниялар ашып, жаңа жұмыс орындарын жасауды жоспарлап отыр.

Афина Миао, халықаралық криптовалюта биржасының бас коммерциялық директоры:

- Біздің криптовалюта биржамыз Қазақстанда 2023 жылы тіркелді. Қазіргі таңда жеті түрлі лицензиямыз бар. Қазақстандағы финтех нарығының әлеуеті зор. Бизнесті кеңейту үшін біз Астана халықаралық қаржы орталығын таңдадық. Себебі ол Орталық Азиядағы ең ірі іскерлік орталық. Оның ашық әрі түсінікті реттеу жүйесі өте ыңғайлы, болжауға да жеңіл.