Қазақстанда қатерлі ісік диагностикасының мерзімі өзгерді пациенттер нені білуі керек

Қазақстанның Денсаулық сақтау министрлігі онкологиялық көмек көрсетуді ұйымдастырудың жаңартылған стандартын енгізіп жатыр, қазіргі уақытта құжат талқылау кезеңінде. Құжатта пациенттердің қатерлі ісікке күдік туған сәттен бастап диагноз қойылып, мамандандырылған ем басталғанға дейінгі өтуі тиіс жолының нақты мерзімдері белгіленген, деп хабарлайды TengriHealth.

Қандай мерзімдерді белгілеу ұсынылады?

Денсаулық сақтау министрлігінің хабарлауынша, жаңартылған стандарт пациент бағытын цифрлық бақылауды қарастыратынын және диагностика мен емдеудің негізгі кезеңдерінен өтудің бірыңғай мерзімдерін белгілейтінін түсіндірді.

7 жұмыс күніне дейінгі мерзімде пациент тіркелген жері бойынша емханада алғашқы зертханалық зерттеулерден, ультрадыбыстық және рентгенологиялық диагностикадан өтуі тиіс. Диагнозды растау немесе жоққа шығару үшін компьютерлік және магниттік-резонанстық томография (КТ және МРТ), эндоскопиялық зерттеулер мен биопсия жүргізуге 10 жұмыс күніне дейін уақыт беріледі. Егер пациентке ПЭТ/КТ, иммуногистохимиялық және молекулалық-генетикалық зерттеулерді қоса алғанда, мамандандырылған зерттеулер қажет болса, 20 жұмыс күніне дейін уақыт бөлінеді. Бұл тексерулер аурудың сатысын анықтау және ең қолайлы емдеу әдісін таңдау үшін қажет. Диагноз расталғаннан кейін 30 жұмыс күніне дейінгі мерзімде дәрігерлер мультидисциплинарлық консилиум өткізіп, емдеудің жеке тактикасын айқындауы және терапияның түпкілікті жоспарын бекітуі тиіс. Сондай-ақ онкологиялық орталықтан 200 шақырымнан астам қашықтықта тұратын пациенттер үшін қосымша 5 жұмыс күні қарастырылған. Бұл уақыт жолды ұйымдастыруға және қажетті тексерулерден өтуге жұмсалады.

Анықтама: Биопсия - бұл ауруды (мысалы, қатерлі ісікті) растау немесе жоққа шығару мақсатында зертханалық зерттеу үшін дәрігердің тіннің немесе жасушаның шағын фрагментін алатын медициналық процедурасы. ПЭТ-зерттеу (позиттронды-эмиссиялық томография, ПЭТ) - бұл ағзалардың құрылымын ғана емес, олардың қалай жұмыс істейтінін де көрсететін заманауи диагностикалық әдіс.

Онкологиялық көмекте не өзгерді?

Денсаулық сақтау министрлігі еліміздегі онкологиялық қызметтің жұмысы туралы мәліметтерді бөлісті.

"2025 жылдың қорытындысы бойынша қатерлі ісік ауруларын ерте сатысында анықтау үлесі 34 пайыздан асты. Сәулелік терапияның қолжетімділігі 65 пайызға жетті, ал пациенттердің бес жылдық өмір сүру деңгейі 65 пайызға дейін өсті", - делінген хабарламада.

Кейінгі бес жылда қатерлі ісіктерден болатын өлім-жітім 14 пайызға төмендеп, қазіргі уақытта 100 мың тұрғынға шаққанда 62 жағдайды құрайды.

Денсаулық сақтау министрлігінің мәліметінше, бүгінде Қазақстанда 251 мыңнан астам адам онкологиялық аурулар бойынша диспансерлік есепте тұр. Бұл ретте пациенттердің жартысынан көбі - еңбекке қабілетті жастағы адамдар.

Жыл сайын елімізде қатерлі ісіктің 43 мыңнан астам жаңа жағдайы анықталады.

Google News арқылы жаңалықтарымызды қадағалаңыз

Жазылу

қатерлі ісік

аурухана

науқастар

диагноз

емдеу