Қазақстанда қатерлі ісікке қарсы дәрі тіркеуге дайындалып жатыр

Қазақстандық қатерлі ісікке қарсы дәрі 2027 жылы пайда болуы мүмкін. Қазіргі уақытта препарат пациенттерге клиникалық сынақтардың екінші кезеңінен өтіп жатыр, содан кейін ол тіркеуден өтпек. Бұл туралы Ғылым және жоғары білім министрі Саясат Нұрбек айтты, деп хабарлайды TengriHealth.

Министрдің сөзінше, сынақтар Астанадағы онкологиялық орталық базасында жүргізіліп жатыр. Қазіргі кезеңде мамандар препараттың қажетті мөлшерін анықтап, пациенттер ағзасының оның түрлі дозасына реакциясын зерттеп жатыр.

"Қазір пациенттерге нақты дозалауды сынау жүріп жатыр. Биылғы жылдың аяғына дейін осы процедуралардың барлығын аяқтап, дәріні тіркеуге өтінім беруге тырысамыз", - деді Саясат Нұрбек Үкіметте өткен брифингте.

Клиникалық сынақтың екінші кезеңі аяқталғаннан кейін расталған нәтиже сараптамаға жіберіледі. Министр бұдан әрі Дәрілік заттарды сараптау ұлттық орталығы арқылы препаратты тіркеу процедурасы күтіп тұрғанын түсіндірді. Шенеуніктің айтуынша, қазір әзірлеушілер препаратты тіркеу алдындағы соңғы кезеңде тұр.

Дәрі Қазақстанда қашан пайда болуы мүмкін деген сұраққа Нұрбек бұл келесі жылы болуы ықтимал екенін айтты.

"Нақтырақ айтатын болсақ: келесі жылы болуы әбден мүмкін, өйткені биылғы жылдың аяғыга дейін біз осы процедуралардың барлығын аяқтап, Денсаулық сақтау министрлігімен жұмыс істеуіміз керек", - деп түсіндірді министр.

Бастапқыда препаратты Қазақстанда және Еуразиялық экономикалық одақ аумағында пайдалану үшін тіркеу жоспарланған. Егер алдағы уақытта әзірлеушілер басқа нарықтарға шыққысы келсе, дәрі тиісті елдердің талаптарына сәйкес тіркеу процедураларынан өтуі керек болады, деп толықтырды ол.

2025 жылдың қарашасында клиникалық сынақтың шешуші кезеңіне көшу туралы хабарланған болатын. Әзірлеуші Дос Сарбасов жануарларға жүргізілген клиникаға дейінгі зерттеулер сәтті өткенін айтты.

Жаңа кезеңде емдеу тәсілі өзгертілді: препараттың ісік пен метастаздарға тікелей әсерін, сондай-ақ пациенттердің оны көтере алу деңгейін бағалау үшін ол стандартты химиотерапияға дейін қолданыла бастады.

Биылғы 31 наурызда клиникалық сынақ басталғаны белгілі болды, қатерлі ісікке қарсы отандық DVC препараты пациенттерге сыналып жатыр.

Сынақтар Ұлттық ғылыми онкологиялық орталық базасында өтті, онда жасанды интеллектті қолдана отырып, адаптивті сәулелік терапияны қоса алғанда, емдеудің заманауи әдістері қатар енгізіліп жатыр. Орталықтың мәліметінше, пациенттердің 80 пайыздан астамы емделді және мамандар нәтижені оң бағалады.

Биылғы мамырда Саясат Нұрбек адамдарға жүргізілген сынақтың бірінші кезеңі аяқталғанын, ал алдын ала нәтиже көңіл көншітерлік екенін хабарлады: зерттеудің барлық қатысушысы аман, кейбір пациенттерде ісік кішірейген.

Google News арқылы жаңалықтарымызды қадағалаңыз

қатерлі ісік

Дәрі-дәрмек

Саясат Нұрбек

Қазақстан

сынақ

Ғылым және жоғары білім министрлігі