Қазақстанда Wildberries қоймаларының көшірілуі мүмкін екендігіне қатысты пікір білдірілді

Қазақстанның Сауда және интеграция министрлігі Wildberries компаниясы елде логистикалық инфрақұрылымын кеңейтуі мүмкін деген хабарларға қатысты пікір білдірді. Ведомство қосымша қоймаларды орналастыру мәселесі бойынша компаниядан әзірге ресми өтініш түспегенін мәлімдеді. Бұл ретте министрлік ұлттық мүдде мен заңнама талаптарына сәйкес келген жағдайда, мұндай ұсынысты қарастыруға дайын екенін атап өтті, деп хабарлайды Tengri Life.

Министрлік не деді?

Сауда және интеграция министрлігінде ірі халықаралық сауда платформаларының логистикалық инфрақұрылымының дамуын жіті қадағалап отырғанын атап өтті.

Сонымен қатар ведомство бүгінде Wildberries компаниясы Қазақстанда қосымша қоймалар ашу туралы бастамамен жүгінбегенін мәлімдеді.

"Қазіргі уақытта Wildberries компаниясынан Қазақстан аумағында қосымша қойма қуаттарын орналастыру мәселесіне қатысты ресми өтініш түскен жоқ. Тиісті ұсыныстар келіп түскен жағдайда, олар Қазақстанның ұлттық мүдделері ескеріле отырып, заңнама талаптарына сәйкес қаралады", - деп хабарлады Сауда министрлігі.

Қазақстан жобаларды қандай шарттармен қарастыруға дайын?

Министрлік Қазақстан үшін халықаралық компаниялардың жобалары елге ұзақ мерзімді экономикалық пайда әкелуі маңызды екенін атап өтті.

"Министрлік үшін халықаралық компаниялардың кез келген жобалары елдің ұлттық мүдделеріне сай, өзара тиімді негізде жүзеге асырылуы маңызды. Мұндай жобалар отандық кәсіпкерлер үшін жаңа мүмкіндіктер қалыптастырып, Қазақстан экономикасына инвестиция тартуға және жаңа жұмыс орындарын ашуға ықпал етуі тиіс", - делінген түсініктемеде.

Сондай-ақ ведомство Қазақстанның айтарлықтай транзиттік және логистикалық әлеуетке ие екенін және заманауи инфрақұрылымды дамытуға мүдделі екенін еске салды.

"Министрлік заманауи қойма және логистикалық инфрақұрылымды дамытуға, жаңа жұмыс орындарын құруға, сондай-ақ трансшекаралық электрондық сауданы ілгерілетуге бағытталған инвестициялық жобаларды қолдайды", - деп атап өтті министрліктегілер.

Бұл ретте нарықтың барлық қатысушысы үшін бірыңғай ереже қолданылады.

"Тауарларды тасымалдау, сақтау және айналымға шығару процестері Қазақстанның қолданыстағы заңнамасымен және Еуразиялық экономикалық одақтың құқықтық нормаларымен реттеледі. Осыған байланысты нарықтың жекелеген қатысушылары үшін қандай да бір ерекше жағдайлар немесе арнайы талаптар көзделмеген", - деп түйіндеді ведомство.

Жаңа қоймалар туралы мәселе неден туындады?

Бұған дейін Ресейлік БАҚ дереккөздеріне сілтеме жасап, Wildberries маркетплейсін дамытушы RWB тобы Қазақстаннан бос қоймалар іздей бастағанын хабарлаған болатын. Басылым мәліметінше, компания 100 мың шаршы метрге жуық алаңды жалға алу мүмкіндігін қарастырып, нарықтағы қолжетімді ұсыныстарды зерттеп жатыр.

Wildberries компаниясы ол кезде өздері жұмыс істейтін елдерде логистикалық инфрақұрылымды жоспарлы түрде дамытуды жалғастырып жатқандарын мәлімдеген.

Компания мәліметінше, Қазақстанда қазірдің өзінде екі ірі логистикалық нысан - Алматыда алаңы 100 мың шаршы метрден асатын және Астанада 160 мың шаршы метрлік қоймалар салынып жатыр.

Сонымен қатар Wildberries қазір негізгі күш тауарларды әртүрлі қоймаларға қайта бөлуге бағытталғанын атап өткен.

"Қазір біздің барлық ұйымдастырушылық күш-жігеріміз тауарларды айналымға ыңғайлы ету және серіктестеріміздің экономикалық тұрақтылығын қамтамасыз ету үшін әртүрлі қоймаларда қайта бөлуге бағытталған", - деп хабарлады компания.

Мән-жайы

Кейінгі апталарда Wildberries-тің Ресейдегі бірнеше логистикалық нысаны өртенді.

Алдымен Тамбов облысындағы Котовскіде және Мәскеу облысындағы Электростальда компания қоймалары өртенді. Ресми мәлімет бойынша, сегіз адам қаза тауып, 50-ге жуық адам жарақат алған.

Кейін Краснодар мен Ставрополь өлкесінің Невинномысск қаласындағы логистикалық кешендерде, Ленинград облысы, Тверь, Симферополь және Рязань облысындағы нысандарда өрт шықты.

Оқиғалардан кейін Wildberries логистикалық процестерді қайта құрғанын және тауарларды қоймаларда қайта бөліп жатқанын хабарлады. Компания негізін қалаушы Татьяна Ким бұл маркетплейстің тұрақты жұмысын сақтауға мүмкіндік беретінін, ал сатып алушылар, соның ішінде қазақстандық сатып алушылар, тапсырысты әдеттегі режимде рәсімдей алатынын мәлімдеген болатын.

Тағы оқыңыз: Wildberries қоймаларына жасалған шабуылдан кейін қазақстандықтардың тапсырыстары не болмақ: компания жауабы

Google News арқылы жаңалықтарымызды қадағалаңыз

Жазылу