Атырау онкодиспансері Сарықамысқа көшірілуі мүмкін

Сарықамыс ықшамауданындағы Фтизиопульмонология орталығының бос тұрған ғимаратын онкодиспансердің балансына беру мәселесі қарастырылып жатыр.

«Ақ Жайық» редакциясына мекемені қала шетіне көшіру туралы хабарламалар түсе бастағаннан кейін, редакция Атырау облысының денсаулық сақтау басқармасына ресми сауал жолдады.

Ведомствоның жауабында қазіргі уақытта Фтизиопульмонология орталығының ғимаратын онкодиспансердің балансына беру жұмыстары жүргізіліп жатқаны нақтыланды. Диспансерді көшіру туралы түпкілікті шешімді атқарушы және уәкілетті органдар қабылдауы тиіс.

Мүмкін болатын көшірудің себебін басқарма қолданыстағы корпусты бұзу және 180 төсекке арналған жаңа онкологиялық диспансер салу жоспарымен байланыстырады.

Жауапта ықтимал көшу мерзімі көрсетілмеген. Сондай‑ақ күн сайын амбулаторлық ем қабылдайтын — химиотерапия, процедура және консультацияға келетін науқастар үшін көлік қолжетімділігі мәселесі де белгісіз қалды. Ведомство ғимаратта пациенттерді тасымалдауға арналған кіреберіс аймағы мен лифт болуы тиіс екенін атап өтті, алайда қоғамдық көлік бағыттары немесе қосымша қолдау шаралары туралы ақпарат берілмеген.

Ал Сарықамыс ықшамауданы Атыраудың шетінде орналасқан және орталық аудандардан, көпшілік тұрғын аймақтардан едәуір қашық. Емнен әлсіреген онкопациенттер үшін күн сайын ұзақ жол жүру үлкен қиындыққа айналуы мүмкін.

Көшкен жағдайда төсек‑орын саны өзгермейді, деп хабарлады басқарма.

Жаңа орталық құрылысы кешеуілдеп жатыр

Сонымен қатар басқарма радиологиялық корпус пен болашақ онкология орталығының құрылысына қатысты жағдайды түсіндірді.

Ведомство дерегіне сәйкес, радиологиялық корпустың құрылымдық бөлігі аяқталған: сыртқы және ішкі қабырғалар қаланып, шатыр жабылған. Алайда бастапқы жобада жоспарланған жабдықты орналастыру мүмкін болмай шыққан. Бұған құрылыс нормалары мен халықаралық стандарттар себеп болған. Осыған байланысты қосымша жобалық‑сметалық құжаттама әзірлеу қажет.

Жобалық‑сметалық құжаттама 2022 жылы әзірленген, ал 2024 жылы жергілікті бюджет есебінен құрылыс басталған. Қазір құжаттамаға түзетулер енгізілуде, оны аяқтау 2026 жылдың мамырына жоспарланған. Жоба «Мемсараптама» РМКқарауында, қорытындысы 2026 жылдың наурызында шығарылмақ.

Түзету аясында болашақ орталыққа қосымша жабдық — рентгендік эндоваскулярлық аппарат «Ангиограф» (биплан) және екінші сызықтық үдеткіш енгізу жоспарланып отыр. Екінші үдеткіштің қажет болуы шетелде жасалған жабдықтың жиі бұзылу қаупіне және оны жөндеудің ұзақ мерзіміне байланысты деп атап өтілді.

Жаңа онкология орталықғы мен радиологиялық корпусты пайдалануға беру бұрын 2025 жылдың соңына жоспарланған еді. Бұл мерзім құрылыс аяқталуының негізгі межесі ретінде көрсетілген болатын.

Денсаулық сақтау басқармасы жобаның түзетуден өтіп жатқанын хабарлады. Осыдан кейін құрылыс мерзімін ұзарту жөнінде ұсыныстар енгізілмек, себебі жобадағы құрылыс ұзақтығы 18 айды құрайды. Алайда жауапта нақты жаңа аяқталу күні көрсетілмеген.

Осылайша, диспансерді көшіру туралы ресми шешім әлі қабылданған жоқ, бірақ Сарықамыс ықшамауданындағы ғимаратты беру бойынша дайындық жүргізіліп жатыр. Жаңа онкология орталығының құрылысы мерзімдердің кейінге шегерілуімен жалғасуда, ал алдағы жылдары онкодиспансер нақты қай жерде жұмыс істейтіні әзірге белгісіз күйінде қалып отыр.

Анастасия ШЕРСТЯНКИНА

Бүгін, 18:33