Қазақстандық Ресейдегі құрылыс алаңындағы өрттен кейін қаза тапты

Ресейдің Омбы қаласындағы құрылыс алаңында шыққан өрттен кейін қазақстандық азамат көз жұмды. Қазақстан Сыртқы істер министрлігі оқиғаға қатысты пікір білдірді, деп хабарлайды Tengrinews.kz тілшісі.

Омбыда құрылыс алаңындағы өрт

Ресейлік БАҚ мәліметінше, Омбыда құрылыс алаңындағы өрт 15 тамызда болған. Салдарынан екі жұмысшы қаза тапты, олардың бірі 2002 жылы туған Қазақстан азаматы болып шықты.

Алдын ала мәлімет бойынша, қазақстандық денесінің 70 пайызын күйік шалып, 18 тамызда ауруханада көз жұмды.

Жас жігіт нысанда мердігер ретінде жұмыс істеген "Глобал инжиниринг" компаниясында еңбек еткені анықталды. Қазіргі уақытта тергеушілер өрт себебін, сондай-ақ құрылыс алаңындағы қауіпсіздікке жауапты адамдарды анықтап жатыр.

Қазақстан СІМ мәліметінше, ҚР-ның Омбыдағы Бас консулдығы барлық қажетті консулдық-құқықтық көмек көрсетіп жатыр, оның ішінде құжаттарды рәсімдеу және азаматтың өліміне қатысты мән-жайлар бойынша Ресейдің құзыретті органдарымен өзара іс-қимыл жасау бар.

"СІМ қаза тапқан азаматтың отбасымен байланыста және өз құзыреті шеңберінде қажетті көмек көрсетіп жатыр", - деді министрлік.

Сондай-ақ Қазақстан СІМ марқұмның жақындары мен туыстарына көңіл айтты.

Бұған дейін Солтүстік Кипрде қазақстандық әйел ауыр пышақ жарақатын алған болатын. Оқиғаның мән-жайын мына материалдан оқыңыз.

Google News арқылы жаңалықтарымызды қадағалаңыз