Қазақстандық теннисшілер Roland Garros Junior Series финалына жолдама үшін таласады

Жарыс "Gorky Tennis Park" кешенінің топырақ төсенішті корттарында өтіп, Орталық және Батыс Азия елдерінің үздік жас теннисшілерін жинады.

Өткен кездесулердің қорытындысы бойынша турнирдің шешуші матчтарына қатысушылар анықталды. Қазақстандық теннисшілер ұлдар және қыздар арасында жүлделі орындар үшін күресті жалғастыруда.

Ұлдар арасындағы бәсекеде бірінші орын үшін қазақстандық Родион Трайгель сынға түседі. Шешуші матчқа дейін ол алдымен сириялық Мухамад Эяд Салимді үш сетте — 6:3, 5:7, 6:2 есебімен жеңсе, кейін отандасы Амир Аскардан 6:2, 6:4 есебімен басым түсті. Бірінші орын үшін кездесуде оның қарсыласы Иран өкілі Киараш Садегизейди болады. Ол бұған дейін түрікменстандық Алы Гельдыев пен қазақстандық Бексұлтан Бауыржановты жеңді.

Қыздар арасындағы жарыста да Қазақстанның бірнеше өкілі сәтті өнер көрсетуде. Алуа Марат Елизавета Нигматулинаны — 6:3, 6:3, одан кейін тартысты үш сетке созылған кездесуде Айым Қанағатованы 7:5, 5:7, 6:2 есебімен жеңіп, бірінші орын үшін матчқа жолдама алды. Оның қарсыласы турнир барысында Амина Нұрмахан мен Тамина Сәкенді жеңген Өзбекстан өкілі Александра Бармичева болады.

Жарыстың қорытынды матчтары 22 тамызда өтеді. Ойын күні сағат 10:00-де басталады. Бірінші орын үшін кездесулерден бөлек, қатысушылар қорытынды кестедегі өзге орындарды да сарапқа салады.

Финалдық матчтар аяқталғаннан кейін марапаттау рәсімі өтеді.

Еске сала кетейік, "Roland-Garros Junior Series by Renault – Qualifications West and Central Asia" турнирі Алматыда 17-22 тамыз аралығында өтуде.

Жарыс Қазақстан теннис федерациясы, Азия теннис федерациясы (ATF) және Алматы қаласы әкімдігінің қолдауымен ұйымдастырылған. Турнирге Орталық және Батыс Азия елдерінен 16 жасқа дейінгі жас теннисшілер қатысуда.Іріктеу кезеңінің жеңімпаздары қазан айында Жапонияда өтетін "Roland-Garros Junior Series" финалдық кезеңінде өнер көрсету мүмкіндігіне ие болады. Онда үздік жас теннисшілер "Roland-Garros" жасөспірімдер турнирінің негізгі кезеңіне жолдама үшін таласады.