Қазақстандық төрт боксшы Дубайдағы финалда жұдырықтасады

Бокстан әлем чемпионатында Сабыржан Аққалықов жекпе-жексіз финалға жолдама алды.

Оның жартылай финалдағы өзбекстандық қарсыласы жарақатына байланысты жарыс жолынан шығып қалды. Енді отандасымыз шешуші сында ресейлік спортшымен алтын медальды сарапқа салады.

Бокстан әлем чемпионатының ақтық кезеңінде 4 спортшымыз өнер көрсетеді. Алдымен 54 келіде Сәкен Бибосынов жартылай финалда непалдық қарсыласын ұтып, финалға жолдама алды. Оразбек Асылқұлов 57 келіде ресейлік боксшыдан айласын асырды. Ал 71 келіде Абылайхан Жүсіпов қырғыз спортшысынан басым түссе, 75 келідегі Сабыржан Аққалықов өзбекстандық қарсыласының жарақатына байланысты бірден финалға өтті. 

Сәкен Бибосынов, бокстан ұлттық құрама мүшесі:

- Оңай жекпе-жек болған жоқ. Бұл жерде әлемнің мықтылары қатысып жатыр. Өз елдеріндегі номері бірінші боксшылар. Қазір барлық жерде бокс қатты дамыған. Сондықтан оңай болған жоқ. Бапкерлерімнің тактикасын дұрыс орындап, жеңіске жеттім. Енді финалда жақсы бокстасу үшін бар күшімізді саламыз.     

Абылайхан Жүсіпов, бокстан ұлттық құрама мүшесі:

- Бүгін жеңгеніме өте қатты қуаныштымын. Мен үшін тағы бір белес болды. Өздеріңіз білесіздер оның алдында 3 әлем чемпионатында қола алған болатынмын. Бүгін енді алтынға бір қадам жақындадым. Өте қуаныштымын. Қазақстанда жүргендеймін. Жанкүйерлерге рақмет қолдауларыңызға. 

Финалда өнер көрсететін 4 боксшымыздың үшеуінің жолы ресейлік споршылармен түйісіп отыр. Атап айтқанда, Сәкен Бибосынов пен Сабыржан Аққалықов және Абылайхан Жүсіпов көрші елдің былғары қолған шеберлерімен жұдырықтасады. Ал Оразбек Асылқұлов Тәжікстан өкілімен алтын медельды сарапқа салады.   

Оразбек Асылқұлов, бокстан ұлттық құрама мүшесі:

- Ресей боксшысымен өте тартысты жекпе-жек болды. Ресейден 13 боксшы келіп, оның бәрі де полуфиналға шыққан. Әлі ешкім ұтылмап еді. Енді міне біреуі менен ұтылды. Енді финалға дайындаламын. Келесі қарсыласты қараймыз, зерттейміз.

Шорт-трекшілер 9 лицензия ұтып алды 

- Ал шорт-трекшілер XXV қысқы олимпиада ойындарына 9 лицензия жеңіп алды. Дәлірек айтсақ, 4 спортшымыз төрт жылдықтың басты додасында өнер көрсетеді. Яғни Абзал Әжіғалиев, Денис Никиша және Ольга Тихонова мен Яна Хан қысқы ойындарда ел намысын қорғайды. Олар 500 метрлік сынға 4 лицензия, 1000 метрлік бәсекеде екеу, 1500 метр қашықтықта тағы екеу және 2 мың метрлік аралас сынға 1 жолдама жеңіп алды. Яғни 4 шорт-трекші ел қоржынына  9 лицензия салды. Әзірге қазақстандық спортшылардың еншісінде бас аяғы 2 спорт түрінен 11 лицензия бар. Оның екеуі мәнерлеп сырғанушылар Михаил Шайдоров пен Ольга Самоделкинаға тиесілі.   

Мейрам Сапарғалиев, ҚР Туризм және спорт министрлігі Спорт және дене шынықтыру істері комитетінің ресми өкілі:

- Қазір ҚР спорт түрлері бойынша ұлттық құрамалар жан жақты әлем біріншіліктеріне, куоктық, этаптық, рейтингтік жарыстарға қатысып жатыр. Жалпы биылғы қысқы спорт түрлері бойынша олимпиа ойындарына 10 спорт түрінен қатысуды жоспарлап отырмыз. 30-ға жуық спортшыда қазір мүмкіндік бар. Оның ішінде биатлон, шаңғымен сырғанау, шаңғы спорты түрдері, конькимен жүгіру және шорт-тректегі әр дисциплинасын қосқанда 10 спорт түрінен қатысамыз. 

Биылғы XXV қысқы олимпиада ойындары Италияның Милан мен Кортина қалаларында өтеді. Онда бас аяғы 195 медаль жиынтығы сарапқа салынады. Төртжылдықтың басты додасы ақпанның 6-сы басталып, 22-сіне дейін жалғасады. 

Данияр Қасқарауов, ҚР Парламенті Мәжілісінің депутаты:

- Қаңтар айының аяғына дейін тағы да лицензия алуға мүмкіндіктер бар екен. Уақыт аз қалды. Қысқы жазғыға қарағанда қаражатты көп қажет етеді. Қысқы спорттың базалары жағынан бізде жетіспеушіліктер бар. Мысалы жақсы дамығна шорт-тректің базалары жоқ деп айтылып жатады, көтеріліп жатады.  

Дзюдодан ел чемпионаты басталды 

Жаңаөзенде дзюдодан жастар арасында ел чемпионаты басталды. Жарысқа елдің түкпір-түкпірінен келген 500-ден астам спортшы қатысып жатыр. Биылғы біріншіліктің ерекшелігі халықаралық ареналарда көзге түсіп жүрген жас дзюдошылар да сынға түседі. Олардың қатарында жасөспірімдер арасындағы әлем чемпионы Жасұлан Батырғали мен әлем чемпионатының жүлдегерлері Қайырғали Ролан мен Мұхамедәлі Жылқайдар бар. Дода 14 желтоқсанға дейін жалғасады.