Қазақстандық жоғары оқу орындарындағы оқу құны туралы сұрақ министрге қойылды

Неге кейбір ұлттық жоғары оқу орындарында оқу құны шетелдік біліммен теңесіп қалды және оның сапасы белгіленген бағаға сәйкес келе ме? Бүгін Үкіметте өткен брифингте министр Саясат Нұрбекке осындай сұрақ қойылды, деп хабарлайды Tengrinews.kz тілшісі.

Министрдің айтуынша, ведомство жоғары оқу орындарымен оқу ақысы мәселесі бойынша жұмыс істеп жатыр.

"Біз баға өсімі ең көп дегенде 10–15 пайыз болуы үшін университеттермен ауқымды жұмыс жүргізіп жатырмыз - бұл инфляциямен, шығыс материалдары және тарифтердің өсуімен байланысты. Біз бұны бақылауда ұстап отырмыз", - деді Нұрбек.

Оның сөзінше, мемлекет білім беру гранттарының санын арттыруды және оқу ақысын төлеудің баламалы тәсілдерін дамытуды жалғастырып жатыр. Олардың қатарында "Ұлттық қор - балаларға" бағдарламасының қаражаты мен жеңілдетілген білім беру несиелері бар.

Бұл ретте қазақстандықтар соңғы аталған құралды пайдаланбайды, деп мәлімдеді Саясат Нұрбек.

"Мұндай несиені бар болғаны алты адам алды: алдыңғы жылы екі адам, былтыр төрт адам. Биыл әзірге өтінім де түскен жоқ. Мүмкін, бұл құрал туралы ақпараттандыру жұмысы жеткіліксіз деңгейде шығар", - деді министр.

Шенеунік мемлекет ұлттық университеттердегі оқу құнын бақылайтынын атап өтті. Оның айтуынша, жекеменшік жоғары оқу орындары бағаны белсенді көтереді, алайда олар нарық принциптері бойынша әрекет етеді.

Қымбат оқу сапалы білім мен болашақта жұмысқа орналасуға кепілдік бере ме деген сұраққа жауап бере отырып, министр жоғары оқу орындарын аккредиттеудің қолданыстағы жүйесірн еске салды.

Оның сөзінше, қазақстандық университеттер тек жергілікті емес, шетелдік аккредиттеу агенттіктерінде де бағалаудан өте бастады. Атап айтқанда, Қазақстанда білім сапасын бағалау жөніндегі британдық агенттіктің өкілдігі тіркелді.

Жоғары оқу орындарын бағалаудың басты құралы жаңа ұлттық рейтинг болуы тиіс, оны алғаш рет 2026 жылдың аяғында таныстыру жоспарланып отыр.

"Ата-аналар мен талапкерлер университеттің қандай орында тұрғанын, оның мықты және әлсіз тұстары неде екенін, түлектердің жұмысқа орналасу пайызын, ғылым деңгейін, инфрақұрылыммен және зертханалармен қамтамасыз етілуін, оқыту сапасын нақты көре алады", - деді Нұрбек.

Сондай-ақ рейтинг нақты жоғары оқу орны қандай мүмкіндіктер беретінін, түлектің жұмыс табу мүмкіндігі мен қандай еңбекақыға үміт арта алатынын көрсетуі тиіс.

"Бұл өте маңызды әрі ауқымды құрал болады. Біз оған қатысты жұмыс істеп жатқанымызға үш жыл болды", - деп толықтырды министр.

Бұған дейін 2025-2026 оқу жылында ұлттық жоғары оқу орындарының бірінде бірқатар бағдарлама бойынша бакалавриат құны 1,6–1,8 миллион теңгеге жеткені туралы жазған болатынбыз. Назарбаев Университетінде бір жылдық оқу құны 3,066-дан 7,665 миллион теңгеге дейін, ал кейбір бағдарламалар бойынша 15 мың доллар болды.

2026 жылы бакалавриатқа 75 мыңнан астам мемлекеттік грант бөлінді, ал конкурсқа 127 мыңға жуық талапкер өтінім берді.

Тағы оқыңыз: “Қуаныштан жылап отырмын“: желіде болашақ студенттердің алғашқы әсері пайда болды

Google News арқылы жаңалықтарымызды қадағалаңыз