Қазақстандықтар ең көп шұғылданатын спорт түрлері белгілі болды

АСТАНА, 2 шілде – Sputnik. Спорт саласында көрсетілетін қызмет көлемі тұрақты өсіп келеді. 2026 жылдың қаңтар-наурыз айларының қорытындысы бойынша бұл көрсеткіш 79,4 млрд теңгеге жетіп, өткен жылдың сәйкес кезеңімен салыстырғанда 11,3%-ға артқан, деп жазды Ranking.kz.

Алайда өсім ауылдық жерлерде аса байқалмайды. 2026 жылдың алғашқы үш айында ауылдық жерлердегі спорт саласы бойынша көрсетілген қызмет көлемі 6,3 млрд теңгені құрады. Бұл 2025 жылдың осы кезеңімен салыстырғанда 6%-ға төмен. Дегенмен ұзақ мерзімді көрсеткіш бойынша ауылдағы спорт саласы айтарлықтай дамыған: 2022 жылмен салыстырғанда қызмет көлемі 3,5 есеге артқан. Қазіргі таңда ауылдық жерлердің спорт нарығындағы үлесі 7,9%-ды құрайды.

Фитнес пен спорт клубтарына сұраныс артты

2026 жылдың бірінші тоқсанында фитнес-клубтар бағытындағы қызмет көлемі 22,3 млрд теңгеге жетіп, бір жыл ішінде шамамен үштен бірге өскен.

Екінші орында спорт клубтары тұр. Бұл бағыттағы қызмет көлемі 18,1 млрд теңгені құрады. Оған бұқаралық спорттық іс-шаралар, турнирлер, жарыстар, футбол, гольф және басқа да спорт клубтарының қызметі кіреді.

Ал спорт нысандарын пайдалану саласындағы қызмет көлемі 10,7%-ға өсіп, 11 млрд теңгеге жетті.

Қазақстандықтардың жартысына жуығы спортпен айналысады

Қазақстанда халықтың спортқа қызығушылығы артып келеді. 2025 жылы 3 жастан асқан тұрғындардың 47,7%-ы дене шынықтырумен және спортпен айналысқан. Бір жыл бұрын бұл көрсеткіш 46,5% болған.

Қалаларда спортпен айналысатындар үлесі 48,3%-дан 49,3%-ға өсті. Ал ауылдық жерлерде бұл көрсеткіш 43,5%-дан 45%-ға дейін артты.

Қала мен ауыл арасындағы айырмашылық әлі де бар, бірақ ауылдағы өсім қарқыны жоғарырақ.

Спорттың негізгі тірегі – мектептер мен оқу орындары

2025 жылы халықтың 28,1%-ы мектептерде, колледждерде және жоғары оқу орындарында спортпен айналысқан. Тағы 19,2%-ы спортпен өз бетінше айналысады. Ал кәсіби спортпен айналысатындардың үлесі небәрі 0,4%-ды құрайды.

Бұл Қазақстанда бұқаралық спорттың негізгі бағыты – балалар мен жастарды мектеп, секция және әуесқой жаттығулар арқылы қамту екенін көрсетеді.

Инфрақұрылым – басты мәселелердің бірі

Елімізде шамамен 26 мың спорт нысаны бар. Бірақ олардың 1 мыңнан астамы жөндеуді қажет етеді.

2025 жылы халықтың спорт инфрақұрылымымен қамтылу деңгейі 59,6%-ға жетті. 2024 жылы бұл көрсеткіш 55,1% болған. Мемлекеттік жоспар бойынша 2029 жылға қарай бұл көрсеткішті 65%-ға жеткізу көзделіп отыр.

Өткен жылы Қазақстанда 147 спорт кешені пайдалануға берілді. Оның 107-сі ауылдық жерлерде орналасқан. 2026 жылы тағы 121 спорт нысанын іске қосу жоспарланған.

Футбол – ең танымал спорт түрі

Қазақстанда ең көп сұранысқа ие спорт түрі – футбол. 2025 жылғы мәлімет бойынша елімізде 19,4 мың футбол секциясы жұмыс істейді. Оларда 1,1 млн адам жаттықты. Бұл барлық спорт секциясындағы қатысушылардың 16%-ын құрайды.

Футбол секцияларының жартысынан көбі ауылдық жерлерде орналасқан. Ауылдардағы 9,9 мың секцияда 522 мың адам спортпен айналысады.

Қазақстанда футбол инфрақұрылымы да маңызды мәселелердің бірі болып отыр. Ел аумағында 7 мыңнан астам футбол алаңы бар, бірақ оның 1,4 мыңы жөндеуді қажет етеді. Сонымен қатар тағы 1,7 мың жаңа алаңға қажеттілік бар.

Елімізде Шымкент, Ақтөбе және Алматы қалаларында жаңа футбол стадиондарын салу жоспарланған.

Ұлттық спорт түрлеріне қызығушылық жоғары

Футболдан кейінгі орында ұлттық спорт түрлері тұр. Қазақстанда ұлттық спорт бойынша 17,2 мың секция жұмыс істейді, онда 659,9 мың адам жаттығады. Бұл бағыт ауылдық жерлерде ерекше танымал. Ауылдарда 11,2 мың ұлттық спорт секциясы бар.

Ең көп таралған ұлттық спорт түрлерінің қатарында тоғызқұмалақ пен қазақ күресі бар. Бұл екі бағытта 11,1 мың секция жұмыс істеп, 367,5 мың адамды қамтиды.

Сонымен қатар волейбол, баскетбол, үстел теннисі, шахмат, жеңіл атлетика, футзал, дойбы және бокс та кең таралған. Қатысушылар саны бойынша футболдан кейін волейбол алда келеді. Бұл спорт түрімен 725,3 мың адам айналысады.