Қазақстандықтар Отан қорғаушы күнін атап өтіп жатыр

АСТАНА, 7 мамыр – Sputnik. Бүгін Қазақстанның Қарулы күштерінің құрылғанына 34 жыл толып отыр. 2012 жылдан бері бұл дата Отан қорғаушы күні ретінде аталып келеді.

Егемен ел Қарулы күштерге зор сенім артады

1992 жылы 7 мамырда мемлекеттік қорғаныс комитеті Қазақстанның қорғаныс министрлігі болып қайта жасақталған болатын. Сол кезде президенттің жарлығымен Қазақстанның Қарулы күштері құрылды. Араға 20 жыл салып, Қарулы күштердің ресми туған күні мемлекеттік мәртебеге ие болды.

Қарулы күштердің Жоғарғы бас қолбасшысы – президент Қасым-Жомарт Тоқаев жыл сайын Отан қорғаушы күні қарсаңында мемлекеттік марапат пен әскери шен тапсырады. Биыл да Ақордада салтанатты жиын өтті. Мемлекет басшысы егемен еліміздің Қарулы күштерге зор сенім артып отырғанын ерекше атап өтті.

"Бүгінде Қазақстанның айбынды армиясы батыр бабалардың даңқты жолын лайықты жалғастырып келеді. Сайыпқыран сарбаздарымыз – қасиетті Тәуелсіздігіміздің берік қалқаны. Олар еліміздің тыныштығын, жеріміздің тұтастығын қас қақпай күзетіп тұр. Күштік құрылымдар заң үстемдігін, қоғамдық тәртіп пен ұлттық қауіпсіздікті қамтамасыз етуде. Құтқарушылар қатерден қаймықпай азаматтардың амандығы үшін тынымсыз еңбек етіп жүр. Жауынгерлеріміз күрделі міндеттерді табысты орындап, халықаралық тұрақтылықты нығайту ісіне де зор үлес қосуда. Қазақстан – Біріккен Ұлттар Ұйымының бітімгерлік миссиясын дербес орындау мәртебесіне ие болған Тәуелсіз Мемлекеттер Достастығы ішіндегі жалғыз мемлекет. Бұл әлем елдерінің қазақ армиясына деген сенімі жоғары екенін көрсетеді", – деді Тоқаев.

Оның айтуынша, әскери оқу орындарының үздік түлектеріне бірден "аға лейтенант" дәрежесін беруге қатысты тиісті түзетулер қарастырылып жатыр. Жалпы, биыл және келесі жылдар әскери білім беру сапасын арттыруға арналады.

Қарулы күштерде түбегейлі реформа болады

Ақордада өткен салтанатты жиында Тоқаев кез келген қақтығыс дипломатиялық жолмен, келіссөздер арқылы шешудің маңыздылығына да тоқталды. Бірақ әрқашанда "ас пен тас" стратегиясын жүргізуге дайын болуымыз қажет.

"Біз халықаралық құқық қағидаттары мен нормалары қатаң сақталуы керек деп санаймыз. Қазақстан әлемнің барлық елімен достық қарым-қатынасын нығайта береді. Осы мызғымас ұстанымдар жаңа Ата заңымызда нақты айқындалды. Бірақ бұл қамсыз отыру қажет деген сөз емес. Еліміз түрлі сын-қатердің алдын алуға және кез келген қауіпке төтеп беруге дайын болуға тиіс. Сондықтан мемлекетіміздің қорғаныс қабілетін күшейтіп, әскерімізді ең бірінші кезекте технологиялық тұрғыдан жаңғырта беруіміз қажет", - деді Тоқаев.

Оның айтуынша, бұл – қазіргі тұрақсыз, құбылмалы заманның талабы.

"Соны ескере отырып, ең алдымен, Қарулы күштерімізді және әскери мекемелерімізді түбегейлі реформалау керек. Бұл – стратегиялық маңызы зор міндет, оны созбай, екі жыл ішінде орындау қажет", – деп атап көрсетті президент.

Биыл әскери парад бола ма

Былтыр Отан соғысының аяқталғанына 80 жыл толғанда 7 мамырда әскери парад өткізуге шешім қабылданды. Оған 4 мыңнан астам әскери қызметші, 300-ден аса қару-жарақ пен әскери техника, соның ішінде Ұлы Отан соғысы кезіндегі әскери техниканың үлгілері қатысты.

Биыл Астанада әскери парад өтпейді. Дегенмен, барлық жерде мерекелік шаралар ұйымдастырылады. Мәселен, Астанада әскери техника көрмесі өтеді. Барлық шараны мына жерден көруге болады.

Қарулы күштер туралы не білеміз

Қазақстанның Қарулы күштерінің құрамына құрлықтағы әскер, әуе қорғанысы күштері және әскери-теңіз күштері кіреді.

Құрлық әскерлері 1993 жылы 21 сәуірде бұрынғы Орта Азия әскери округінің 40-шы жалпы әскери армиясының негізінде құрылды. Қазіргі уақытта Құрлық әскерлерінің құрамына төрт өңірлік қолбасшылық пен десанттық-шабуылдау әскерлері кіреді.

Құрлық күштерінің өңірлік қолбасшылықтары:

"Астана" өңірлік қолбасшылығы;

"Шығыс" өңірлік қолбасшылығы;

"Батыс" өңірлік қолбасшылығы;

"Оңтүстік" өңірлік қолбасшылығы.

Әскери-теңіз күштері президент жарлығымен 1993 жылғы 2 сәуірде құрылды. Ал Қарулы күштердің дербес түрі болып түпкілікті 2003 жылғы 7 мамырда қалыптасты. Әуе қорғанысы күштері 1998 жылы құрылған.

Мамырда неше күн демаламыз

Осы айда бірнеше маңызды мейрам бар. Олар:

1 мамыр – Қазақстан халқының бірлігі күні;

7 мамыр – Отан қорғаушы күні;

9 мамыр – Жеңіс күні;

27 мамыр – Құрбан айт.

Отан қорғаушы күні мемлекеттік мерекелер тізіміне кіреді. Сондықтан ол күні демалыс беріледі. Жеңіс күні сенбіге түсіп тұр. Сондықтан дүйсенбі, 11 мамырда қосымша демалыс беріледі.

Жалпы, мамыр айында бес күндік жұмыс аптасымен істейтін қазақстандықтар сенбі-жексенбі мен мереке күндерін қоса алғанда 14 күн демалады. Ал алты күн жұмыс аптасында барлығы 9 күн демалыс болады.