Түркия халқы Республика күнін атап өтіп жатыр

Мұстафа Кемал Ататүріктің басшылығымен Анадолыны оккупациядан азат еткеннен кейін, Түркия Ұлы Ұлттық Мәжілісі (ТҰҰМ/парламент) 1923 жылы 29 қазанда Түркия Республикасының құрылуын ресми түрде жариялады. Сол күннен бастап «егемендік халыққа тиесілі» қағидасы үкіметтің негізіне айналды.

1920 жылдың 23 сәуірінде парламенттің ашылуы елдегі билік монархиядан халық қолына ауысқан жаңа дәуірдің басталуын белгіледі. Тәуелсіздік соғысындағы жеңістен және 1923 жылы 24 шілдеде Лозанна келісіміне қол қойылғаннан кейін жаңа мемлекеттің тәуелсіздігі халықаралық деңгейде танылды.

1923 жылы 13 қазанда Анкара ресми түрде Түркияның астанасы болып жарияланды, ал екі аптадан кейін, 29 қазанда парламент жаңа басқару түрін – республиканы бекітіп, Мұстафа Кемал Ататүрікті тұңғыш президент етіп сайлады.

Содан бері Республика күні (түрікше: Cumhuriyet Bayramı) ұлттық мереке ретінде аталып өтіп келеді. 1924 жылы жаңа мемлекеттің негізін қалауды еске алу үшін жыл сайын мерекелік шаралар өткізу және 101 зеңбіректен салют ату туралы шешім қабылданды.

Бүгін, 102 жылдан кейін Түркия бұл күнді бостандықтың, тәуелсіздіктің және ұлттық бірліктің символы ретінде ерекше мақтанышпен атап өтіп жатыр.

Қасым-Жомарт Тоқаев Режеп Тайып Ердоғанды және түрік халқын ұлттық мерекесі – Республика күнімен құттықтады.