БАӘ дегі отандастарымыз Республика күнін атап өтті

Араб әмірліктеріндегі отандастарымыз елдің ең ұлық мерекесі - Республика күнін атап өтті. Абу Дабиде доп додасы ұйымдастырылып, Қазақстан азаматтары бас қосты. Жырақта жүрген дипломат, кәсіпкер және ұлттық компания өкілдері жасыл алаңда өзара бақ сынасып, мерекелік көңіл-күйге енді.

Елшілік ұйытқы болып, бірқатар бизнес өкілі қолдау көрсеткен іс-шарада араб жеріндегі қазақ қауымдастығының ынтымақ-бірлігі насихатталды. Егемендік декларациясы қабылданған күннің мән-маңызы екшеліп, тарихи құндылығы дәріптелді. Мемлекеттік әнұран шырқалды. Балалар жасыл алаңда асыр салып ойнады. Көпшілік күткендей, доп додасы тартысты сәттерге толы болды.

Аян Дүйсембаев, Қазақстан елшілігіндегі Ішкі істер министрлігінің өкілі:

- Қазақ жанұяларының бәрі жиналып, жарысты аштық. Әнұранымыз шырқалды. Ұлттық ойындарымыз ойналды. Қазір футболдан жарыс өткізіп жатырмыз. Патриот балаларымыз жүгіріп жүр. Соларға тәрбие беру ретінде әр уақытта ұйымдасқан түрде елшілік жұмыс істеп отырады.

Салауатты өмір салтын ұдайы ұстанатын Қазақстан азаматтары сегіз команда жасақтады. Бірі елшілік, бірі бас консулдық, енді бірі студенттер құрамасы мен мәдени орталық болып, бәсеке көрігін қыздырды. Нәтижесінде Дубайда таяуда құрылған «Qazaq culture center» ұжымы жеңіске жетті.

Азамат Ерқасым, кәсіпкер, жарысқа қатысушы:

- Бағымыз бен бабымыз бірге шауып, алғашқы турнирде чемпион атанып отырмыз. Осындай мейрамдар көп болсын. Шет елде әнұрамыз шырқалғанда керемет сезімде боламыз. Осындай сезімдер көп болсын! Жарысты ұйымдастырушыларға көп рақмет.

Турнир қорытындысы бойынша жеңімпаз бен жүлдегер командалар марапатталып, үздік ойынымен көзге түскендер арнайы номинацияға ие болды. Жиналғандар арасында мерекелік көңіл-күй орнап, достық рухтағы әңгімелер айтылды. Араб әмірліктерінде қазір мыңдаған отандасымыз тұрады. Көбі жұмыс бабымен уақытша қоныс аударған болса, студенттер әмірлік университеттерінде оқиды. Елден жырақта жүрсе де олар мемлекеттік мерекелерде жиі бас қосып, ұлттық бірегейлікті сақтап келеді. 

Авторы: Рауан Мыңбай