Қазақстандықтар тасжолдарда жүргеннен кейін қомақты айыппұлдар алды ІІМ себебін атады

Ішкі істер министрлігі ақпараттық жүйедегі техникалық ақау салдарынан қате жазылған жылдамдықты асырғаны үшін айыппұлдарға қатысты жағдайды түсіндірді, деп хабарлайды Tengri Auto.

ІІМ Әкімшілік полиция комитетінің төрағасы Мұрат Қабденовтің айтуынша, ақау 13-14 тамыз аралығында Бас прокуратураның ЕРАП ақпараттық жүйесінде болған.

Оның сөзіне қарағанда, орташа жылдамдықты асырудың бір бөлігі қателікпен лездік жылдамдықты асыру ретінде ресімделген.

"Қазіргі уақытта әріптестерімізбен бірлесіп техникалық ақаудың салдарын жою бойынша жұмыс жүргізіп жатырмыз", – деп атап өтті Мұрат Қабденов.

Сондай-ақ ол жүргізушілерге полицияға өзі келудің немесе айыппұлдың қате екенін дәлелдеудің қажеті жоқтығын баса айтты.

"Қате толтырылған барлық нұсқамалар анықталды және олар автоматты түрде жойылатын болады", – деді Әкімшілік полиция комитетінің басшысы.

ІІМ ақпаратынша, бұл тек аталған техникалық ақау нәтижесінде тасжолдарда қате жазылған айыппұлдарға қатысты. Мұндай айыппұлдарды төлеп қойған жүргізушілерге келсек, қазіргі уақытта төленген қаражатты қайтару механизмі қарастырылып жатыр.

Бұған дейін редакциямызға Алматы – Қорғас тасжолында орташа жылдамдықты асырғаны үшін жаппай айыппұл салынғаны туралы жүргізушілер хабарласқан болатын. Оқырмандардың мәліметінше, бір күннің ішінде 100-ге жуық жүргізушіге айыппұл келген.

Бұл ретте заң бұзушылықтар әртүрлі уақытта тіркелген. Аталған учаскеде жылдамдық шегі сағатына 110 шақырым деп белгіленген.

Қаулыларда орташа қозғалыс жылдамдығы көрсетілген, алайда жүргізушілерге оның нақты қай нүктелер арасында, қандай уақыт аралығында есептелетіні және заң бұзушылықтың қандай принцип бойынша анықталатыны түсініксіз.

Сонымен қатар жүргізушілер айыппұл сомасының қомақты екеніне назар аударды. Олардың айтуынша, ең төменгі сома шамамен 118 мың теңгені құраса, бүгін бір жүргізушіге келген ең жоғарғы айыппұл 1 миллион теңгеден асқан.

Сондай-ақ редакция Алматы – Қорғас тасжолындағы айыппұлдарға қатысты жағдайды түсіндіруді сұрап, ІІМ-ге сауал жолдады.

Google News арқылы жаңалықтарымызды қадағалаңыз