Қазақстандықтар зейнетақы жинағын жұмсауға асықпайды: қаңтарда өтінімдер күрт азайды

2026 жылдың қаңтар айында қазақстандықтар тұрғын үй жағдайын жақсарту үшін зейнетақы жинақтарын пайдалану бойынша 38,6 мың өтінім рәсімдеген, – деп хабарлайды Aikyn.kz сайты.

Nege.Aqsha деректеріне сәйкес, бұл көрсеткіш — 2024 жылдың маусымынан бергі ең төмен деңгей. Бір жыл ішінде өтінімдер саны шамамен үштен біріне қысқарса, ал 2025 жылдың желтоқсанымен салыстырғанда көрсеткіш 90 пайызға жуық төмендеген.

Сарапшылар желтоқсандағы күрт өсімді азаматтардың 2026 жылдан бастап жеткіліктілік шегінің өсетіні туралы ақпаратты естіп, зейнетақы қаражатын алдын ала пайдаланып қалуға тырысқанымен байланыстырады.

Қаңтар айында тұрғын үй мақсаттарына жалпы 50,9 миллиард теңге бағытталған. Бұл желтоқсанмен салыстырғанда 77 пайызға аз болғанымен, өткен жылдың қаңтар айынан 5 пайызға жоғары. Яғни өтінім саны азайғанымен, жалпы жұмсалған қаражат көлемі айтарлықтай төмендемеген.

Өтінімдердің азаюына Отбасы банкінің жаңа талаптары да әсер еткен. Жаңа ережеге сәйкес, зейнетақы жинақтары ипотеканы мерзімінен бұрын өтеу кезінде тек негізгі қарызды жабуға ғана пайдаланылып, пайыздық төлемдерге жұмсалмайды.

Сонымен қатар, емделуге арналған өтінімдер саны да күрт азайған. Қаңтар айында бұл мақсатта бар болғаны 600 өтінім мақұлданып, 600 миллион теңге жұмсалған.