Қазақстандықтар жедел жәрдемнің қайда келе жатқанын көре алады ережелерде тағы не өзгереді

Қазақстанда жедел медициналық көмек көрсету ережелері өзгерді. Енді пациенттер шақыртылған бригаданың қай жерде келе жатқанын нақты уақыт режимінде көре алады. Бұдан бөлек, өзгерістер шұғыл шақыртулар мен емханалардың мобильді бригадалары жұмысына да қатысты болады, - деп хабарлайды Tengri Health.

Тиісті бұйрыққа денсаулық сақтау министрі Ақмарал Әлназарова қол қойды. Жаңа ережелер 13 қазаннан бастап қолданысқа енеді.

Қазақстандықтар жедел жәрдемнің қай жерде келе жатқанын біле алады

Құжаттағы басты жаңалықтардың бірі жедел жәрдем көлігінің қозғалысын бақылауға қатысты.

Диспетчер бригаданы шақыртуға жібергеннен кейін пациентке автоматты түрде хабарлама барады. Сондай-ақ оған геосервистердің көмегімен бригаданың орналасқан жері мен қозғалысын нақты уақыт режимінде бақылау мүмкіндігі берілуі тиіс.

Ол үшін жедел жәрдемнің автоматтандырылған жүйесі бригада тағайындалғаннан кейін қажетті мәліметтерді тиісті сервиске жіберіп отырады.

Айта кетейік, жедел жәрдемді тек 103 нөмірі арқылы ғана емес, мобильді қосымшалар, мессенджерлер мен чат-боттар арқылы, оның ішінде геолокацияны жолдау арқылы шақыру мүмкіндігі ережеде бұрын да қарастырылған болатын.

Төртінші санат енді "шұғыл жағдай"

Жедел жәрдем көрсету ережелерінен "шұғыл көмектің төртінші санатындағы шақырту" ұғымы алып тасталады. Оның орнына "шұғыл жағдай" ұғымы енгізіледі.

Бұған жіті ауру немесе созылмалы аурудың асқынуынан туындаған, ағзалар мен жүйелер қызметінің кенеттен және айқын бұзылуы байқалмайтын, сондай-ақ пациенттің өмірі мен денсаулығына тікелей немесе әлеуетті қауіп төндірмейтін жағдайлар жатады.

Бұл ретте бригадалардың жету уақыты өзгермейді:

бірінші санаттағы шұғылдық - 10 минутқа дейін; екінші - 15 минутқа дейін; үшінші - 30 минутқа дейін; шұғыл жағдайлар (бұрынғы төртінші санат - ред. ескертпесі) - 60 минутқа дейін.

Шұғыл шақыртулар мобильді бригадалардың жұмыс уақытында алғашқы медициналық-санитарлық көмек ұйымдарына - емханаларға жіберіледі.

Жұмыс күндері мұндай бригадалар сағат 08:00-ден 20:00-ге дейін жұмыс істейді. Бұл ретте емханаларға жіберілетін шақыртулар жұмыс күндері сағат 08:00-ден 19:00-ге дейін, ал сенбі күні 08:00-ден 12:00-ге дейін тіркеледі.

Егер шұғыл шақырту емханалардың жұмыс уақытынан тыс кезде түссе, оған жедел медициналық көмек станциясының бригадасы қызмет көрсетеді.

Пациенттің міндетті түрде тіркелген мекенжайында болуы шарт емес: мобильді бригада шақыртуға пациенттің өз қызмет көрсету аймағындағы нақты жүрген жері бойынша баруы тиіс.

Медицина қызметкерлеріне бейнежетондар беріледі

Өзгерістер медицина қызметкерлерінің қауіпсіздігіне де қатысты.

Жедел жәрдем бригадалары мен емханалардың мобильді бригадалары рациялар, тағып жүретін бейнежетондар және мобильді камералармен жабдықталуы тиіс. Олардың көмегімен пациентке қызмет көрсету және оны ауруханаға тасымалдау кезінде болып жатқан жағдайларды аудио- және бейнежазбаға түсіруге болады.

Емханалардың мобильді бригадаларының көлігі де GPS-бақылау және бейнебақылау жүйелерімен жабдықталады.

Егер шақырту кезінде медицина қызметкерлерінің өміріне немесе денсаулығына қауіп төнсе, шақыртуға полиция қызметкерлері барады.

Ата-анасы ауруханаға әкетілсе, балалардың жағдайы не болады?

Ережеде жедел жәрдем кәмелетке толмаған баланың жалғыз ата-анасын немесе заңды өкілін ауруханаға жатқызған жағдай бөлек жазылған.

Егер бала осыдан кейін қараусыз қалса, ол полиция қызметкерлеріне тапсырылуы тиіс. Бұдан әрі олар баланы ата-анасының қамқорлығынсыз қалған балаларға арналған ұйымға уақытша орналастырумен айналысады.

Пациентті қайда апарады?

Егер пациенттің өміріне қауіп төнсе - мысалы, жіті жүрек-қан тамырлары немесе тыныс алу жетіспеушілігі кезінде - ол шұғыл көмек көрсететін жақын маңдағы стационардың қабылдау бөліміне жеткізілуі тиіс.

Бұл ретте пациенттің қай жерге тіркелгені маңызды емес.

Өзгерістер Денсаулық сақтау министрінің 2026 жылғы 29 қыркүйектегі № 125 бұйрығымен енгізілді.

Құжат 13 қазаннан бастап қолданысқа енгізіледі.

Бұған дейін Денсаулық сақтау министрлігі жұмыс орнында пациенттер немесе олардың туыстары тарапынан шабуылға ұшыраған медицина қызметкерлерінің өмірі мен денсаулығын сақтандыруды ұсынған болатын. Толығырақ - мына материалда.

Бізді Google-дың негізгі дереккөздер тізіміне қосыңыз

Қосу

Қазақстан

жедел желі

Денсаулық сақтау министрлігі