Қазақстандықтардың 90% дан астамы медициналық сақтандыру жүйесіне қосылды

АСТАНА, 31 қаңтар – Sputnik. Міндетті әлеуметтік медициналық сақтандыру жүйесінің тарихында алғаш рет ел азаматтарының 90%-дан астамы сақтандырылған деген мәртебеге ие болды, деп хабарлайды Денсаулық сақтау министрлігі.

2025 жылдың шілде айында Қазақстанда МӘМС жүйесіне бірқатар маңызды жаңалық енгізілді. Нәтижесінде биылғы жылдың қаңтарынан бастап жергілікті бюджет қаражаты есебінен МӘМС жүйесі арқылы дағдарыс және төтенше деңгейдегі шамамен 1 миллион адам қосымша қамтылды.

"Табысы төмен тағы 5% Қазақстан азаматтары МӘМС арқылы жоспарлы медициналық көмекке қол жеткізді. Алғаш рет тәжірибеде әкімдіктер дағдарыстық және төтенше деңгейдегі жұмыссыз азаматтардың МӘМС жүйесіне жарна төлейтін механизм енгізді", - дейді министрлік.

Қиын өмірлік жағдайда қалған адамдар енді медициналық көмексіз қалмайды. Бұл жауапкершілікті мемлекет өз мойнына алады.